काठमाडौं । भारतीय अर्ध सैनिक बल (एसएसबी) प्रवेश गरेर सुस्तामा नापजाँच गरेपछि नेपाली पक्षले सुरक्षा बढाएको छ । नवलपरासी पश्चिमको सुस्तामा आइतबार भारतीय सुरक्षाकर्मीहरु हतियारसहित प्रवेश गरेर नेपाली भूमिमा नापजाँच गरेका थिए ।
त्यसलगत्तै प्रमुख जिल्ला अधिकारीलगायत नेपाली सुरक्षाकर्मीको टोली सुस्ता पुगेर सो क्षेत्रको निरीक्षण गर्नुका साथै गस्ती बढाएको छ । सोमबार प्रमुख जिल्ला अधिकारी धर्मेन्द्रकुमार मिश्र, जिल्ला प्रहरी प्रमुख, सशस्त्रका एसपी लगायतको टोलीले सो क्षेत्रको अनुगमन गरेको हो।
त्यसक्रममा प्रजिअ मिश्रले अनधिकृत रुपमा नेपाल प्रवेश गर्नेहरुलाई कारबाही गर्न सुरक्षाकमीलाई निर्देशन दिनुभएको छ । साथै, कुनै समस्या परे तत्काल आफूलाई खबर गर्न पनि स्थानीयसँग आग्रह गर्नुभएको छ ।
‘उहाँहरुलाई हटलाईनमा बस्नुस् मेरो जतिखेर पनि फोन उठ्छ, केही समस्या पर्यो भने फोन गर्नुस् भनेका छौं’ प्रजिअ मिश्रले भन्नुभयो, ‘शसस्त्र प्रहरीलाई पनि बिना अनुमति र जानकारी आउँछन् भने तिनीहरुलाई कानूनी कारबाही गर्नुस् भनेर निर्देशन दिएका छौं ।’
नेपाल तर्फको भूमिलाई विवादित बनाएर भारतीय पक्षले आफ्नो कब्जामा पार्न प्रयास गरिरहेको सुस्ता गाउँपालिकाका अध्यक्ष रामप्रसाद पाण्डेले बताउनुभयो । आइतबार एसएसबीको हतियारसहितको एक टुकडीले झोलुङगे पुलदेखि करिब १५० मिटरको दूरीमा नापजाँच गरेको थियो । त्यसपछि स्थानीयले आफूहरुलाई खबर गरेको अध्यक्ष पाण्डेले बताउनुभयो ।
सुस्तामा बेलाबेलामा भारतीय एसएसबीले नेपाल तर्फ प्रवेश गरेर दुःख दिने गरेका छन् । कहिलेकाँही त झडपकै अवस्था समेत आउने गरेको छ ।
नेपालीकै भूमि भए पनि १९ हजार ९ सय ८० हेक्टर भारतले अतिक्रमण गरिसकेको छ । सुस्तामा ०६३ कात्तिकबाट सेना बस्न थालेपछि भने एसएसबीको ज्यादती कम भएको स्थानीय बताउँछन् ।
