बागलुङ । बागलुङको काठेखोला गाउँपालिका–४ तंग्राममा रहेको श्री धारा माध्यमिक विद्यालयले देउसी भैलो खेलेर २० लाख ५९ हजार रुपैयाँ संकलन गरेको छ । संकलित रकमबाट विद्यालयले कृषि विषय सञ्चालन गर्ने योजना बनाएको प्रधानाध्याक कमला थापाले जानकारी दिनुभयो ।
‘व्यवहारिक तथा व्यवसायिक शिक्षा आजको आवश्यकता ! सर्वसुलभ, प्रविधिमैत्री गुणस्तरीय शिक्षा हाम्रो प्रतिबद्धता’ भन्ने उद्घोषका साथ विद्यालयले तत्काल सञ्चालन गरिएको गणित र विज्ञान विषयको व्यवस्थापन तथा आगामी दिनमा कृषि विषय सञ्चालनको लक्ष्यसहित देउसी भैलो खेलेको हो ।
कार्यक्रममा बोल्दै विद्यालय व्यवस्थापन समितिका अध्यक्ष अमर थापाले धारा माविले देउसी भैलो मार्फत अभिभावकहरुको बिच लगेको उदेश्यलाई जनताले अनुमोदन गरेको बताउनु भयो । भैलो कार्यक्रमलाई आर्थिक उपलब्धि मात्र नभई समाजमा शैक्षिक अभियानको रुपमा अगाडि बढाएको उहाँको भनाई थियो ।
थापाले गणित तथा विज्ञान विषयको व्यवस्थापन गर्दै अबको आवश्यकता अनुसार कृषि विषय सञ्चालनमा ल्याउन सहयोग पुगोस् भन्ने उद्देश्यका साथ देउसी भैलो खेलिएको बताउनुभयो । उहाँले आर्थिक सहयोग गर्ने सबैलाई धन्यवाद समेत दिनुभएको छ ।
