काठमाडौं । राष्ट्रिय जनमोर्चाले आइतबार सल्यानमा भएको बस दुर्घटनाप्रति दुःख प्रकट गरेको छ । पार्टी प्रवक्ता एवम् उपाध्यक्ष दुर्गा पौडेलले शोक विज्ञप्ति प्रकाशित गरी दुर्घटनाप्रति दुःख व्यक्त गर्नुभएको हो ।
आइतबार सल्यानबाट दाङका लागि छुटेको ना २ ख २५५२ नम्बरको यात्रुबाहक बस दुर्घटना हुँदा १२ जनाको निधन भएको छ भने १८ जना घाइते भएका छन् ।
राजमोले दुर्घटनामा निधन भएका सबै यात्रुहरुप्रति हार्दिक श्रद्धाञ्जली अर्पण गर्दै शोक सन्तप्त परिवारप्रति गहिरो समवेदना प्रकट गरेको छ । निधन भएका यात्रुका परिवारलाई उचित क्षतिपूर्ति उपलब्ध गराउन र घाइते भएका सबै यात्रुको निशुल्क उपचार गर्न राजमोले माग गरेको छ ।
साथै, सरकारले दुर्घटना न्यून गर्न कुनै कार्यक्रम अगाडि नल्याएकोमा राजमोले क्षोभ प्रकट गरेको छ । सबै खालका दुर्घटनाको छानबिन गरी दोषीलाई कारवाही गर्न, दुर्घटना न्यूनीकरण कार्यक्रम तत्काल ल्याउन, यात्रुहरुको दुर्घटनामा बीमा दोब्बर वा त्यस भन्दा बढी गर्न माग गरेको छ ।
यस्तो छ वक्तव्यः
‘सल्यानबाट दाङको तुलसीपुरका लागि छुटेको ना २ ख २५५२ नम्बरको यात्रुबाहक बस २०७८ कार्तिक २१ गते विहान ११ बजे कपुरकोट गाउँपालिका वडा नं. ५ खारखोलामा दुर्घटना हुँदा १२ जनाको निधन भएको छ । यो भयानक दुर्घटनामा परी १८ जना घाइते भएका छन् । दुर्घटनामा निधन भएका सबै यात्रुहरुप्रति हार्दिक श्रद्धाञ्जली अर्पण गर्दै शोक सन्तप्त परिवारप्रति गहिरो समवेदना प्रकट गर्दछौं । निधन भएका यात्रुका परिवारलाई उचित क्षतिपूर्ति उपलब्ध गराउन र घाइते भएका सबै यात्रुको निशुल्क उपचार गर्न माग गर्दछौं ।
दसैं र तिहारको समयमा अत्यधिक दुर्घटना भएका छन् । नेपालमा धेरै दुर्घटना ड्राइभरको लापरवाहीले हुने गरेका छन् । सल्यान दुर्घटना पनि तीब्र गतिको कारण भएको प्रहरीले प्रारम्भिक अनुमान लगाएको छ । अप्ठ्यारो र साँघुरो बाटो, तीब्र गति, पुराना र बिग्रिएका बसका कारण दुर्घटनामा कमी आएको छैन । बस चलाउने ड्राइभरको न्यूनतम उमेर तोक्न, रुटअनुसार गति र समय निर्धारण गर्न, रुटका विभिन्न स्थानमा निर्धारित समयभन्दा अगाडि पु¥याएमा कारवाही गर्ने व्यवस्था गर्नमाग गर्दछौं ।
सरकारले दुर्घटना न्यून गर्न कुनै कार्यक्रम अगाडि नल्याएकोमा क्षोभ प्रकट गर्दछौं । सबै खालका दुर्घटनाको छानविन गरी दोषीलाई कारवाही गर्न, दुर्घटना न्यूनीकरण कार्यक्रम तत्काल ल्याउन जोड दिन चाहन्छौं । हाल यात्रुहरुको दुर्घटनामा बीमा न्यून रहेको छ । यात्रुहरुको दुर्घटनामा बीमा दोब्बर वा त्यस भन्दा बढी गर्न जोडदार माग गर्दछौं ।’
२०७८ कार्तिक २१गते
दुर्गा पौडेल
उपाध्यक्ष तथा प्रवक्ता
