हेटौँडा । हेटौँडामा देउसी खेल्ने क्रममा बसले ठक्कर दिँदा दुई जनाको ज्यान गएको छ । घटनामा परी आठ जना घाइते भएका छन् । घाइते मध्ये एक जनाको अवस्था गम्भीर रहेको प्रहरीले जनाएको छ ।
हेटौँडाको नेवारपानीमा देउसी खेलिरहेको समूहमाथि शनिबार राति पौने १० बजे हेटौंडाबाट चितवनको भरतपुरतर्फ जाँदै गरेको बागमती प्रदेश ३, ००१ ख ०९३६ नम्बरको बसले ठक्कर दिएको थियो ।
बसको ठक्करबाट हेटौंडा उपमहानगर– १५ का सुजन विष्ट र चितवनको पिप्ले घर भएका प्रेम सिंहको मृत्यु भएको जिल्ला प्रहरी कार्यालय मकवानपुरले जनाएको छ ।
घाइते ८ जनामध्ये एक जनाको अवस्था गम्भीर छ । उनको चितवनमा उपचार भइरहेको छ ।
‘नेवारपानीको सडक नजिकैको मन्दिर अगाडि नाचगान गर्दै देउसी खेलिरहेको स्थानीयको समूहलाई अनियन्त्रित रुपमा आएको बसले ठक्कर दिएको हो । ठक्कर दिने बसमा स्थानीयवासीले आगजनी गरेका छन् । दुर्घटनापछि बसका चालकलाई नियन्त्रणमा लिइएको प्रहरीले जनाएको छ ।
