काठमाडौं । प्रधानन्यायाधीश चोलेन्द्र शमशेर जबराले कसैले दबाब दिँदैमा राजीनामा नदिने बताउनुभएको छ । एक टेलिभिजन अन्तर्वार्तामा प्रधानन्यायाधीश राणाले न्यायापालिकाको प्रमुखले सडकबाट कसैले माग्दैमा राजीनामा दिन नहुने बताउनुभयो ।
आफू संविधानप्रति निष्ठा र ईमानदारिता व्यक्त गर्ने व्यक्ति भएको भन्दै उहाँले आफूले न्यायापालिकालाई सुदृढ तवरले अघि बढाएको दाबी पनि गर्नुभएको छ । आफू संवैधानिक विधि र प्रक्रियाअनुसार नै प्रधानन्यायाधीश भएको भन्दै संवैधानिक विधि र प्रक्रियाबाटै बहिर्गमन हुने पनि जबराले स्पष्ट पार्नुभयो ।
‘प्रधानन्यायाधीशको जिम्मेवारीको हिसाबले म केवल चोलेन्द्र मात्र होइन, म त संस्था पनि हुँ’ उहाँले भन्नुभयो, ‘जहाँसम्म कानुन व्यवसायीले प्रश्न उठाए, जहाँ मेरा माननीय न्यायाधीशले दुईदिन मात्रै भएपनि विदा लिइदिए हुन्थ्यो नि भने, मैले त्यसमा प्रश्न गरिन। तर, त्यसमा धेरै प्रश्न छ ।’
उहाँले पूर्वप्रधानन्यायाधीशहरुले के भन्छन्, कानुन व्यवासयीहरुले के भन्छन्, त्यसको सरोकार नराख्ने बरु संविधान र कानुनले के भन्छ, त्यतातिर मात्रै आफूले ध्यान दिने बताउनुभयो ।
प्रधानन्यायाधीश राणाले आफूलाई संविधान र कानूनले प्रधानन्यायाधीशका रुपमा जिम्मेवारी दिएको र त्यो पूरा गर्न आफू सक्षम रहेको बताउँदै अन्य न्यायाधीशलाई संविधान र कानूनबमोजिम आआफ्नो जिम्मेवारी पूरा गर्न आग्रहसमेत गर्नुभएको थियो ।
प्रधानन्यायाधीशमाथि मन्त्रिमण्डल विस्तारमा भाग खोजेको भन्ने आरोपका कारण न्यायलयमा प्रश्न उठेको र उक्त प्रश्नको जवाफको माग गर्दै अन्य न्यायाधीशले सुनुवाइ गर्न इन्कार गर्दै आएकाले गत सोमबारदेखि नै मुद्दाको सुनुवाइ हुन सकेको छैन । न्यायाधीशका इन्कारीका कारण मुद्दाको सुनुवाइ हुन नसक्दा टाढाटाढाबाट आएका पालोमा परेका सेवाग्राही मर्कामा परेका छन् ।
