खिमराज चालिसे, चंडिगढ।
भारतको हिमाञ्चल राज्यको रोहडुबाट चंडिगढ जाने क्रममा सम्पर्कविहीन भएका ५० वर्षीय छविलाल सलामीको खोजी गरिदिन परिवारले मूल प्रवाह अखिल भारत नेपाली एकता समाजसँग आग्रह गरेका छन् ।
गत ७ सेप्टेम्वरको रोहडुबाट नेपाल फर्कने क्रममा दुई जना नेपाली मजदुरहरु चंडिगढ बसपार्कमा लुटिएका थिए भने छविलाल सलामी सम्पर्कविहीन भएका थिए ।
सिमलादेखि बसेका तीनजना नेपालीहरुले दोस्ती गरि आफू पनि सुर्खेत जाने बताउँदै मित्रता गर्दै चंडिगढ बसपार्कसम्म सँगै यात्रा गरी त्यहाँ चिया नास्ता सँगै खाएपछि बेहोस भएर लुटिएको र छविलाल सलामी अझै वेपता भएको सँगै यात्रामा रहेका बिक्रमे ढोलीले बताएका छन् ।
केही दिन ढावामा काम गरेर भाडा बनाएर स्वदेश पुगी परिवारमा खबर गरेका बिक्रमे ढोली, छविलालका छोरा रोहित सलामी र महेन्द्र थापालगाएतले छविलालबारे मूल प्रवाहलाई जानकारी गराएका छन् ।
चंडिगढमा समाजका केन्द्रीय सल्लाहकार खिमराज चालिसेको सम्पर्कमा पुगेका उनीहरुले घटनाबारे बताएपछि नगर अध्यक्ष मान बहादुर केसीको नेतृत्वमा मूल प्रवाहको टोलीले घटनास्थल पुगी खोजविन सुरु गरेको छ ।
भारतको चंडिगढमा लुटिएका नेपाली युवकको मूल प्रवाहद्वारा उद्धार
