खिमराज चालिसे, चंडिगढ ।
भारतको चंडिगढमा एक नेपाली युवक लुटिएका छन् । सुर्खेत जिल्लाको चिडगाड गाउँपालिका–१ निवासी अमर बहादुर घर्तीको छोरा १९ वर्षीय केशव घर्ती चंडिगढ बसपार्कमा लुटिएका हुन् ।
उनी आफ्नो अंकलको साथ चंडिगढ आउने क्रममा शिमलाबाट तीन जनाले आफू पनि सुर्खेत जाने बताएपछि सँगै आएको र चंडिगढमा खाना खाएको बताए । खाना खाएलगत्तै आफू बेहोस भएको र होसमा आउँदा सँगै आएका अंकल पनि सामान र पैसासहित बेपत्ता भएको केशवले बताए ।
केशवलाई अलपत्र अवस्थामा सेक्टर१७ को पार्कमा भेटे पछि भारतीय नागरिकले मूल प्रवाह चंडिगढको सम्पर्कमा पुराएका हुन् ।
मूल प्रवाहका केन्द्रीय सल्लाहकार खिमराज चालिसे र सुदूरपश्चिमोत्तर महिला विभागकी सचिव जुना भन्डारी चालिसे तथा पूर्वनगर सदस्य सोम बहादुर घर्तीमगरको पहलमा उनको संरक्षण गरिएको थियो ।
लुटिएका युवकलाई आज (आइतबार) मूल प्रवाह चंडिगढ, सोम बहादुर घर्ती र गोपाल बन्जाडेको आर्थिक सहयोगमा नेपालसम्म पठाइएको छ ।
चाडपर्व हरुको आगमनसँगै भारतबाट नेपाल फर्कने युवाहरु लुटिने घटना दिन प्रतिदिन बढ्न थालेका छन् । गत महिनामा मात्र मूल प्रवाह चंडिगढले यस्ता आधा दर्जन भन्दा बढी लुटपाटका घटनामा शिकार व्याक्तिलाई स्वदेश पठाएको छ ।
मूल प्रवाह अखिल भारत नेपाली एकता समाजले भारतव्यापी रुपमा आम नेपाली नागरिक हरुलाई सतर्कतापूर्वक यात्रा गर्न बारम्बार आग्रह गरेको छ ।
