काठमाडौं । तेजाव आक्रमणविरुद्ध अभियान सञ्चालन गरिरहेकी किशोरी मुस्कान खातुनले अन्तर्राष्ट्रिय पुरस्कार पाएकी छन् । नेपालका लागि अमेरिकी राजदूत र्यान्डी बेरीले मुस्कानलाई अन्तर्राष्ट्रिय साहसी महिला पुरस्कार प्रदान गरेका हुन् ।
राजधानीमा बुधबार आयोजित एक कार्यक्रमबीच नेपालका लागि अमेरिकी राजदूत बेरीले मुस्कानलाई पुरस्कार हस्तान्तरण गरे ।
नेपालमा तेजाब हमला अन्त्यका लागि महत्वपूर्ण योगदान पुर्याएको भन्दै खातुनलाई उक्त पुरस्कारबाट अमेरिकाले सम्मान गरेको हो।
खातुन यो पुरस्कार पाउने पहिलो नेपाली हुन्। अमेरिकाले गत फागुनमा खातुनलाई उक्त पुरस्कार दिने घोषणा गरेको थियो।
पुरस्कार हस्तान्तरण कार्यक्रममा प्रधानमन्त्री पत्नी तथा अधिकारकर्मी आरजु देउवा राणा, पूर्व प्रधानन्यायाधीश शुशीला कार्की, न्यायधीश सपना मल्ल प्रधान र सत्तारुढ नेपाली कांग्रेसकी सचेतक पुष्पा भुषाल लगायतको उपस्थिती थियो।
सो अवसरमा अधिकारकर्मी खातुन तथा राजदूत बेरीले नेपालको संसदमा विचाराधीन एसिड आक्रमणसम्बन्धी अध्यादेश अनुमोदन गर्न आग्रह गरेका थिए।
अमेरिकाले १५ वर्षअघि उक्त पुरस्कार स्थापित गरेको थियो। व्यक्तिगत जोखिम मोलेर असाधारण साहस तथा नेतृत्व प्रदर्शन गरेका विश्वका महिलालाई उक्त पुरस्कार दिने गरिएको नेपालस्थित अमेरिकी दूतावासले जनाएको छ। एक युवकको प्रेम अस्वीकार गरेकोमा खातुनमाथि सन् २०१९ मा तेजाब हमला भएको थियो।
तेजाव आक्रमणबाट उनको हात, अनुहार र छातीमा गहिरो चोट लागेको थियो। त्यसयता खातुनले एसिड पीडित महिलाका पक्षमा वकालत गर्दै आएकी थिइन्। धम्कीका बाबुजत उनले तेजाब आक्रमणबिरुद्द कानुुन ल्याउनका लागि लड्दै आएकी छिन् ।
