काठमाडौँ । राष्ट्रिय जनमोर्चाले सडक दुर्घटना प्राकृतिक बिपत् नभएकाले हटाउन सकिने र सम्बन्धित पक्षले हटाउनैपर्ने बताएको छ ।
अध्यक्ष चित्रबहादुर केसीको हस्ताक्षरमा २०७८ असोज २७ गते शोकवक्तव्य जारी गर्दै राजमोले यस्तो अवधारणा व्यक्त गरेको हो ।

केही दिनअगाडि देखि मुगु, कास्की, अछामलगायत आधार दर्जन जिल्लामा सडक दुर्घटनामा धेरै व्यक्तिको निधन भएको, त्यत्तिकै सङ्ख्यामा घाइते भएकोमा शोकवक्तव्यमा श्रद्धाञ्जली र समवेदना प्रकट गरेको छ ।

सडक यातायातको क्षेत्रमा रहेका कमी–कमजोरी सुधार गरी दुर्घटना न्यूनीकरणतर्फ जोड दिइएको शोकवक्तव्यको पूर्ण पाठ यस्तो छ–

“हालैका दिनमा मुगु, कास्की, अछामलगायत आधा दर्जन जिल्लामा सडक सवारी दुर्घटनामा परी धेरै व्यक्तिको मृत्यु भएको छ र अन्य धेरै व्यक्ति घाइते भएका छन् । हामीले मृतकजनलाई हार्दिक श्रद्धाञ्जली व्यक्त गर्दछौँ । मृतकका शोकसन्तप्त परिवारजनप्रति समवेदना प्रकट गर्दछौँ ।

हामीलाई यसरी शोकवक्तव्य जारी गर्दा अत्यन्त दुःख लागिरहेको छ† किनकि, चाडपर्वको बेला वा यात्रुको चाप हुने बेलामा वा वर्षाकालमा यातायात व्यवसायीले क्षमताभन्दा बढी यात्रु सवार गराउने, लामो दुरीमा पनि एक जना मात्र चालक राख्ने, पुराना र खराब अवस्थाका सवारी साधन चलाउने, यातायात क्षेत्रका सम्बद्ध निकायले सडक यातायातको राम्रो व्यवस्थापन नगर्ने, सडकको खराब स्थिति वा कच्ची सडकका कारणले बर्सेनि ठुलो सङ्ख्यामा नेपालीले आफ्नो जीवन गुमाउनुपरेको छ† ठुलो सङ्ख्यामा घाइते बन्नुपरेको छ र धेरै धनको क्षतिसमेत बेहोर्नु परिरहेको छ ।

दुर्घटनाको बेलामा सरकार र सम्बद्ध निकायले भावनात्मक रूपमा दुःख व्यक्त गर्दछन् । बढीमा राहत सहयोग दिन्छन् तर दुर्घटनाका कारणको निवारण गर्न तत्पर हुँदैनन् वा त्यसको योजनाबद्ध समाधान गर्दैनन् । त्यसकारणले हरेक वर्ष यसरी ठुलो जनधनको क्षति बेहोर्नुपरेको छ । हामीले सरकार र सम्बद्ध निकायलाई यसतर्फ गम्भीर रूपमा ध्यानाकर्षण गराउँदै सडक यातायातको क्षेत्रमा हुने व्यापक सुधार गरी यस प्रकारका सडक दुर्घटना हटाउन माग गर्दछौँ ।

यो कुनै प्राकृतिक बिपत् वा दुर्घटना होइन, मानवीय कमजोरी हो । यसलाई हटाउन सकिन्छ र हटाउनु पर्दछ ।”