टीकाराम थापा, तमघास ।
“खेलकुद र समाज विकाशमा युवा सहभागिता, अनुशासन, आपसी मिलाप र स्वच्छ प्रतिस्पर्धा आजको आवश्यकता” मूल नाराको साथमा स्थापित श्री सुनगाभा युवा परिवार कालीगण्डकी–६ रम्फै गुल्मीले आफ्नो छैटौँ वार्षिकोत्सव खेलकुद तथा विविध कार्यक्रमसाथ २०७८ असोज २२ गते उद्घाटन भएको छ ।
असोज २१ गतेदेखि सुरु भएको सो कार्यक्रमको औपचारिक उद्घाटन दोस्रो दिन २२ गते प्रमुख अतिथि गाउँपालिका उपाध्यक्ष तारा थापाले गर्नुभएको थियो ।
कार्यक्रममा विशिष्ट अतिथि राष्ट्रिय जनमोर्चाका केन्द्रीय सदस्य रामकुमार क्षेत्र तथा अन्य अतिथिमा अखिल नेपाल युवक सङ्घ कालीगण्डकीका अध्यक्ष मेघराज शर्मा, स्थानीय बुद्धिजीवी थोमबहादुर सिञ्जाली मगर, पूर्व वडाध्यक्ष पूर्णबहादुर थापामगर, लालीगुराँस आमा समूहका कोषाध्यक्ष हरिकला थापा र तोलाकोट प्राविका शिक्षिका तिलमाया थापालगायत हुनुहुन्थ्यो।
क्लबका अध्यक्ष बल तारामी मगरको स्वागत मन्तव्यसँगै अघि बढेको सो कार्यक्रममा प्रमुख अतिथि तारा थापाक्षेत्रीले कार्यक्रम सफलताको कामनासहित बरल्बा, रम्फै, बरेङ बागलुङ मोटरबाटोलाई रु. ९२ लाख बजेट, रम्फै, देउराली, कोरेङ खण्डमा विद्यार्थीका लागि पौवा, प्रतिक्षालय निर्माण र रम्फै सिस्ने माइको थान पौवा निर्माणको लागि बजेट निकासा भएको जानकारी गराउनुभएको थियो ।
त्यस्तै, कार्यक्रममा विशिष्ट अतिथि राष्ट्रिय जनमोर्चाका केन्द्रीय सदस्य रामकुमार क्षेत्रीले पनि मन्तव्य राख्नुभएको थियो ।
कार्यक्रममा हालसम्म पुरुष भलिबलका लागि १८ टिम र महिला भलिबलतर्फ दुई टिम दर्ता भएको खेल संयोजक राज सिँजालीले जानकारी दिनुभयो ।
उद्घाटनकै क्रममा प्रमुख र विशिष्ट अतिथिलाई मायाको चिनो प्रदान गरिएको थियो ।
सुनगाभाका संस्थापक सदस्य तथा कालीगण्डकी–६ का जनप्रतिनिधि सदस्य मिरा थापाको अध्यक्षता रहेको कार्यक्रमको सञ्चालन केशर थापामगरले गर्नुभएको हो ।
