काठमाडौं । शेरबहादुर देउवा नेतृत्वमा मन्त्रिमण्डल गठन भएको करिब तीन महिनापछि आज (शुक्रबार) मन्त्रिपरिषद विस्तार हुने भएको छ । बिहीबार बसेको सत्तारुढ दलहरुको बैठकले भागबण्डा मिलाएपछि आज मन्त्रिपरिषद विस्तार गर्न लागिएको हो ।
सत्ता गठबन्धनमा रहेका नेपाली कांग्रेस, नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टीका शीर्ष नेताहरूबीच बिहीबार भएको सहमतिअनुसार शुक्रबार सरकारले पूर्णता पाउँदै छ।
थपिएका मन्त्रीहरूले आज शपथ खाँदै छन् ।
बिहीबारको सहमतिबमोजिम आज ११ बजे मन्त्रिपरिषद् विस्तार गरिने र अपराह्न ४ बजे शपथ समारोह हुने भएको बालुवाटार स्रोतले जनाएको छ।
सहमतिअनुसार कांग्रेसले प्रधानमन्त्रीसहित ९, माओवादी केन्द्रले ५, जसपा र एकीकृत समाजवादीले ४–४ मन्त्रालय पाएका छन्। साथै माओवादी केन्द्र, एकीकृत समाजवादी र जसपाले एक/एक जना राज्यमन्त्री पनि पाएका छन्।
प्रधानमन्त्री पाएको कांग्रेसले रक्षा, सञ्चार, महिला तथा बालबालिका र युवा तथा खेलकुद मन्त्रालय र उद्योग वाणिज्य तथा आपुर्ति मन्त्रालय पाएको छ ।
माओवादी केन्द्रले अर्थ, उर्जा मन्त्रालय लिइसकेको छ । अब उसको कोटामा शिक्षा, भूमि व्यवस्था तथा सहकारी र खानेपानी मन्त्रालय परेको छ ।
यस्तै, एकीकृत समाजवादीले स्वास्थ्यसहित ४ मन्त्रालय पाएको छ । उसले शहरी विकास, संस्कृति तथा पर्यटन र श्रम तथा रोजगार मन्त्रालय पाएको पाएको छ ।
जसपाले भौतिक पूर्वाधार तथा यातायात, कृषि तथा पशुपन्छी, संघीय मामिला तथा सामान्य प्रशासन र वन तथा वातावरण पाएको छ ।
अहिले मन्त्रालयको संख्या प्रधानमन्त्री सहित २२ छ। संविधान अनुसार २५ वटाभन्दा बढी मन्त्रालय बढाउन पाइँदैन।
गठबन्धनका पाँच दलमध्ये राष्ट्रिय जनमोर्चाले भने सरकारमा सहभागी नभई बाहिरबाटै सहयोग गर्ने स्पष्ट पारिसकेको छ ।
एकीकृत समाजवादी सत्तामा, एमालेको रित्तो हात
भागबन्डाअनुसार एकीकृत समाजवादीको भागमा स्वास्थ्य तथा जनसंख्या, श्रम तथा रोजगार, संस्कृति, पर्यटन तथा नागरिक उड्डयन र सहरी विकास मन्त्रालय परेका छन् । साथै उसले एक जना राज्यमन्त्री पनि पाएको छ ।
यति मात्र होइन, नेकपा एकीकृत समाजवादीले प्रदेश १ र बागमती प्रदेश सरकारको नेतृत्व गर्ने अवसर पनि पाउँदै छ । गठबन्धनका दलबीच दुवै प्रदेश सरकार परिवर्तन गर्दै तिनमा एकीकृत समाजवादीका नेतालाई मुख्यमन्त्री बनाउने सहमति भएको हो ।
आफूबाट अलग भएर बनेको पार्टी सत्तामा जाँदै गर्दा कुनै बेला केन्द्रदेखि लगभग सबै प्रदेशमा सरकारको नेतृत्वकर्ता एमाले भने रित्तो हात हुने अवस्थामा आइपुगेको छ। केन्द्र सरकारबाट गत असार २९ गते नै बर्खास्त एमाले अब छिट्टै प्रदेश १ र वागमती प्रदेश सरकारको नेतृत्वबाट पनि हट्दै छ ।
