मेघराज रिष्मेली, टोकियो ।
जापान नेपाली एकता समाजले फुटपरस्त तत्त्वहरूको गतिविधिमा सामेल भई समानान्तर समितिमा बस्नेहरूलाई साधारण सदस्यताबाट निलम्बन गरेको छ ।
२०७८ असोज १६ गते अध्यक्ष यामलाल सापकोटा तथा महासचिव तेजेन्द्र क्षेत्रीद्वारा जारी प्रेसवक्तव्यमा सो जानकारी दिइएको हो ।
एकता समाज गत असोज ११ गते अन्तर्राष्ट्रिय नामबाट गरिएको कथित छैटौँ भेलाको विपक्षमा उभिएको छ । समाजले भनेको छ– ‘दुर्गाबहादुर केसी अध्यक्ष, लुमाकान्त पुन महासचिव र सक्तमान बुढाथोकी कोषाध्यक्ष रहेको अन्तर्राष्ट्रिय नेपाली एकता समाज नै आधिकारिक समिति हो र त्यसैको निर्णय र निर्देशन मान्ने निर्णय भयो ।’
एवम् प्रकारले एकता समाजको मातहत रहेको रक्तिम विभागका संरक्षक रहेका सचित्र केसीले बिहान आफैले रक्तिमको भेलाको अध्यक्षता गर्ने, साँझ कीर्ते लेटरप्याड प्रयोग गरी फुटपरस्त तत्त्वलाई समर्थन गरेकोमा त्यसलाई गैरजिम्मेवार र द्वैध चरित्र रहेको किटानी गरेको छ ।
त्यस्तै, प्रेसवक्तव्यमा फुटपरस्त गतिविधिमा सामेल एकता समाजका सदस्यलाई एकपटक स्वविवेक वा बहकाउमा त्यसो गरिएको हो भनी स्पष्टीकरण सोध्ने र चित्तबुझ्दो जवाफ नआएमा कारबाही गर्ने निर्णय भएको पनि बताइएको छ ।
प्रेसवक्तव्यको पूर्ण पाठ यस्तो छ–
“जापान नेपाली एकता समाज, केन्द्रीय समितिको बैठक समितिका अध्यक्ष यामलाल सापकोटाको अध्यक्षतामा २०२१ सेप्टेम्बर ३० का दिन १०ः०१ मा सम्पन्न भयो । केही दिनदेखि अन्तर्राष्ट्रिय नेपाली एकता समाज र जापान नेपाली एकता समाजको वैधानिक धारणा विपरीत फुटपरस्त गतिविधि सामाजिक सञ्जालमा र केही प्रायोजित मिडियामा देखा परेका छन् । त्यसबाट साधारण सदस्य, शुभचिन्तक र सर्वसाधारणमा पर्न सक्ने भ्रमलाई स्पष्ट पार्न यो वक्तव्य जारी गरिएको छ ।
१. अन्तर्राष्ट्रिय नेपाली एकता समाजको असोज ११ मा भएको भनिएको कथित छैटौँ भेला फुटपरस्त गतिविधिको नमुना हो । यो सङ्गठनभित्रै बसेर सङ्गठन विरोधी गतिविधि गर्ने अराजक र गैरजिम्मेवारीपनको उपज हो । यसबाट हाम्रा सदस्य शुभचिन्तक र सर्वसाधारणलाई कुनै भ्रममा नपर्नु हुन अनुरोध गर्दछौँ । दुर्गाबहादुर केसी अध्यक्ष, लुमाकान्त पुन महासचिव र सक्तमान बुढाथोकी कोषाध्यक्ष रहेको र जापानबाट सालिकराम सापकोटा, गोपाल सापकोटा सदस्य र हेमलाल गौतम सल्लाहकार रहेको अन्तर्राष्ट्रिय नेपाली एकता समाजको समिति नै आधिकारिक समिति हो । त्यही आधिकारिक समितिको निर्णय र निर्देशन मात्रै पालना गर्ने निर्णय भयो ।
२. रक्तिम सांस्कृतिक अभियान जापान जापान नेपाली एकता समाजको विभाग हो । सो विभागका संरक्षक सचित्र केसीले बिहान पुनर्गठित समितिको घोषणा सभाको अध्यक्षता गर्नुलगत्तै त्यही दिन कथित अन्तर्राष्ट्रिय नेपाली एकता समाजको भेलालाई समर्थन गरी त्यो समितिमा सल्लाहकारमा बस्नुले उहाँमा साङ्गठनिक इमान्दारिता नभएको प्रष्टै देखिन्छ । साथै कीर्ते लेटरप्याडमा नक्कली र भ्रामक वक्तव्य प्रकाशित गराउनु र प्रथम कार्यसमितिको अध्यक्षलाई आफू कहिलेदेखि त्यो नेतृत्वमा बसेको हो भन्नेसम्मको हेक्का नहुनुले उहाँको गैरजिम्मेवार र द्वैध चरित्रलाई थप पुष्टि गर्दछ । उहाँलाई रक्तिम सांस्कृतिक अभियानको संरक्षक र एकता समाजको साधारण सदस्यसमेत नरहने गरी निलम्बन गर्ने निर्णय भयो ।
३. फुटपरस्त गतिविधिमा लागेका मान्छेको समर्थन गर्दै सामाजिक सन्जालमा गैरजिम्मेवारीपूर्ण भनाइहरू राख्ने समितिका जिम्मेवार स्थानमा भएका सदस्यहरूलाई उहाँले कसैको बहकाउमा त्यसो गर्नुभयो कि स्वविवेकले हो भन्ने विषयमा स्पष्टीकरण सोध्ने र चित्तबुझ्दो जवाफ नआएमा उक्त पद र जिम्मेवारीबाट हटाउने निर्णय भयो ।
४. अनुशासन र साङ्गठनिक मर्यादा र त्योसँग सम्बन्धित रहेर केही साथीहरूले केही महत्त्वपूर्ण सवाल उठाउनुभयो । त्यस विषयमा पर्याप्त छलफलको आवश्यकता रहेको महसुस गरी पुनः एकपटक उक्त विषयमा मात्रै प्रवेश गरी छलफल गर्ने निर्णय भयो ।
५. फुटपरस्त गतिविधिमा लाग्ने साथीहरूको भ्रममा नपर्न आआफ्नो तह र क्षेत्रबाट पहल गर्ने र उक्त गतिविधिमा लागेका मान्छेको पहिचान गरी उनीहरूलाई जोडिएका हाम्रा सामाजिक समूहबाट हटाउने निर्णय भयो । तिनीहरूले गरेको कुनै पनि गतिविधिप्रति हाम्रो नैतिक जिम्मेवारी रहने छैन । उक्त गतिविधिमा लागेको र समानान्तर समितिमा बसेका सबैलाई साधारण सदस्यसमेत नरहने गरी निलम्बन गर्ने निर्णय भएको जानकारी गराउँछौँ ।”
