दिनेश रैदास, दाङ ।
राष्ट्रिय जनमोर्चाले दाङको राजपुरमा एमसीसी खारेजी तथा संघीयताका विरुद्ध विरोध सभाको आयोजना गरेको छ । राजमो राजपुर गाउँ समितिको आयोजनामा ‘गणतन्त्र र राष्ट्रिय स्वाधिनताको रक्षा गरौं, संघीयता खारेज गरौं’ भन्ने मूल नारासहित जङ्गहवामा विरोध सभा सम्पन्न गरिएको हो ।
विरोध सभालाई अखिल नेपाल युवक संघका पूर्व केन्द्रीय अध्यक्ष काशीनाथ पोख्रेलले सम्बोधन गर्दै नेपाली जनताको लामो त्याग र बलिदानबाट प्राप्त गण्तन्त्र समाप्त पार्न गणतन्त्रवादी भनिने दलहरु नै लागेको आरोप लगाउनुभयो । पोख्रेलले गणतन्त्र स्थापना गर्नमा महत्वपूर्ण भूमिका खेलेका राजनीतिक शक्तिहरू निरंकुश राजतन्त्रको अन्त्य पछी पटक पटक सत्तामा पुगेर गणतन्त्र माथि नै घात हुने गरी राष्ट्रियता, सार्वभौमिकता र जनताले प्राप्त गरेका उपलब्धिहरूलाई समाप्त पार्ने गरी सत्ता स्वार्थमा चुर्लुम्म डुबेको बताउनुभयो ।
उहाँले सत्तामा पुग्नका लागि देशी विदेशी शक्तिहरूसँग अघोषित साँठगाँठ गर्ने गरेकाले प्रतिगमनकारीहरुलाई बल पुगेको बताउँदै गणतन्त्र र धर्म निरपेक्षताको रक्षाप्रति समयमै सचेत रहन आग्रह गर्नु भयो।
त्यस्तै उहाँले संघीयता नेपाली जनताको आवश्यकता र चाहना नहुँदा नहुँदै भारतीय साम्राज्यवाद , अमेरिकी साम्राज्यवाद र यूरेपियन युनियनको स्वार्थमा चोर बाटोबाट नेपालको संविधानमा घुसाइएकोले त्यसको खारेजी अपरिहार्य रहेको बताउनु भयो। उहाँले एमसीसीलाई कूनै पनि हालतमा संसदबाट पारित गर्न नहुने र त्यसका लागि जनदबाब आवश्यक पर्ने बताउनुभयो ।
राजमो राजपुर गाउँ समितिका उपाध्यक्ष दिल बहादुर घर्तीको अध्यक्षतामा भएको विरोध सभामा राजमो जिल्ला उपाध्यक्ष एवम् राजपुर एरिया इन्चार्ज महेश रिजाल, राजमो जिल्ला सदस्य रामफकिरे रैदास, जातीय समता समाज जिल्ला सदस्य राजकुमार विक, राजमो राजपुर वार्ड नं ७ सचिव टेकबहादुर डाँगी, वार्ड नं १ समिति अध्यक्ष बेमराज खनाल लगायतले सम्बोधन गर्नु भएको थियो।
सहिद प्रति एक मिनेट मौनधारण गरी शुरू भएको विरोध सभामा स्वागत मन्तब्य राजमो राजपुर एरिया कमिटी सदस्य तथा अखिल नेपाल ट्रेड यूनियन महासंघका दाङ जिल्ला सदस्य टेकबहादुर बूढाले र सञ्चालन मनकुमार रानाले गर्नु भएको थियो।
