काठमाडौं । लुम्बिनी प्रदेशका पूर्वमुख्यमन्त्री शंकर पोखरेलसहित चार जनाविरुद्ध ‘अपरण तथा शरीर बन्धक’ मा उजुरी परेको छ । प्रदेश सभा सदस्य विमलाकुमारी खत्री वलीले उनीहरुविरुद्ध किटानी जाहेरी दिनुभएको हो ।
तत्कालीन मुख्यमन्त्री शंकर पोखरेल, एमाले प्रमुख सचेतक भूमिश्वर ढकाल, पोखरेलको सचिवालयका किरण गौतम र एमाले दाङका नेता मानबहादुर रावतविरुद्ध किटानी जाहेरी परेको हो ।
पोखरेल मुख्यमन्त्री रहँदा आफूलाई दाङबाट ल्याएर साउन १५ गतेदेखि ५ दिनसम्म बन्धक बनाएकोले अपहरण तथा शरीर बन्धकसम्बन्धी कानुनअनुसार कारबाहीको माग गर्दै किटानी जाहेरी दिएको सांसद वलीले बताउनुभयो ।
वली र माओवादी केन्द्रका प्रमुख सचेतक तुलाराम घर्तीले इलाका प्रहरी कार्यालय बुटवलका प्रमुख डीएसपी मदन कुँवरलाई किटानी जाहेरी बुझाएको र उहाँले घटनाको शुरुवात भएको स्थान दाङमै उजुरी दर्ता गर्न भनेको वलीले बताउनुभयो ।
मुख्य सचेतक घर्तीले भने प्रहरीले जाहेरी दर्ता गर्न आलटाल गरिरहेको बताउनुभएको छ ।
‘हामी अस्ति इलाका प्रहरी कार्यालय बुटवलमा गएका थियो । तर प्रहरीले दाङ रिफर गर्नुपर्ने भन्दै अझै सम्म दर्ता गर्न आलटाल गरेको छ । हामीले यही गर्नुहोस् त्यसपछि जहाँ रिफर गरे पनि गर्नु होला भनेका छौं ,तर प्रहरीले मानेको छैन’ घर्तीले भन्नुभयो ।
वलीले दिएको उजुरीअनुसार अदालतले कसुर ठहर गरेमा पोखरेलसहित ४ जनालाई ७ वर्षदेखि १० वर्षसम्म कैद र सत्तरी हजारदेखि १ लाख रुपैयाँसम्म जरिवाना हुनसक्ने व्यवस्था मुलुकी अपराध संहिता २०७४ मा छ।
