कञ्चनपुर । राष्ट्रिय जनमोर्चा, कञ्चनपुरले जिल्लाका ९ वटै पालिकामा संगठनात्मक अभियान सञ्चालन गर्ने निर्णय गरेको छ ।
अध्यक्ष रामबहादुर कार्कीको अध्यक्षतामा मंगलबार बसेको बैठकले पालिकास्तरमा २० दिने संगठन निर्माणलगायतका कार्यक्रम सञ्चालन गर्ने निर्णय गरेको हो ।
घोषित कार्यक्रम अनुसार शुक्लाफाँटा नगरपालिकामा भदौ ३१ गते, दोधारा चाँदनी नगरपालिका असोज २ गते, बेलडाँडी गाउँपालिका असोज ५ गते, बेदकोट नगरपालिका असोज ६ गते, बेलौरी नगरपालिका असोज ९ गते, भीमदत्त नगरपालिका असोज ११ गते, लालझाडी गाउँपालिका १३ गते, कृष्णपुर नगरपालिका असोज १५ गते र पुनर्वास नगरपालिका असोज १६ गते कार्यक्रम गरिने छ ।
‘राष्ट्रियता, गणतन्त्र र धर्मनिरपेक्षताको रक्षा गरौं, एमसीसी खारेज गरौं’ भन्ने मूल नाराका साथ जिल्लाब्यापी अभियान सञ्चालन गर्न लागिएको अध्यक्ष रामबहादुर कार्कीले जानकारी दिनुभयो ।
यस्तै, बैठकले जिल्लाको शान्ति सुरक्षाकायम गर्न तथा सीमा क्षेत्रमा नेपालीमाथि हुने ज्यादती रोक्नसमेत माग गरेको छ ।
जिल्लाको दक्षिण भेगलाई सदरमुकामसँग जोड्ने सडकहरुको निर्माण कार्य पुनः सञ्चालन गर्न, कलुवापुर बेलौरी र डोकेबजार बेलौरी–बेल्डाडी हुँदै दैजी सम्मको सडक निर्माण गर्न, कृषिजन्य उत्पादनको मूल्य तय गर्न माग गरेको छ ।
यसैगरी, राजमोले जिल्लामा फुटपरस्त तत्वले पारेको भ्रममा नपर्न पनि आम कार्यकर्ता तथा शुभचिन्तकहरुसँग आग्रह गरेको छ ।
