काठमाडौँ । राष्ट्रियसभाको २०७८ भदौ २८ गतेको बैठकमा पनि प्रमुख प्रतिपक्षी दल नेकपा (एमाले) को अवरोध यथावत नै रहेको छ ।
बैठक सुरु हुनासाथ एमालेका सांसदहरूले उभिएर विरोध जनाएपछि राष्ट्रियसभाका अध्यक्ष गणेशप्रसाद तिमल्सिनाले सो पार्टीका सांसद भैरवसुन्दर श्रेष्ठलाई आफ्नो भनाइ राख्न समय उपलब्ध गराउनुभएको थियो ।
सांसद श्रेष्ठले दलीय आधारमा निर्वाचित सांसदलाई दलको निर्देशन नमान्दा आफ्नो दलले गरेको कारबाहीको सिफारिसलाई सभामुखले कार्यान्वयन नगर्दा समस्या उत्पन्न भएको बताउनुभयो । उहाँले दलको निर्देशन नमान्ने १४ सांसदलाई कारवाहीको सिफारिस गरे पनि सभामुखले लामो समयसम्म कार्यान्वयनमा नलगी एमाले विभाजनमा सहयोगी भूमिका खेलेको आरोप लगाउनुभयो ।
सो विषयमा प्रतिनिधि सभाका सभामुखले कुनै किसिमको गल्ती महसुस नगरेको तथा अझैसम्म पनि चित्तबुझ्दो जवाफ नदिएकाले जवाफ नआएसम्मका लागि सदनका काम कारबाही अगाडि नबडढइयोस् भन्दै सांसद श्रेष्ठले सभाअध्यक्ष तिमल्सिनालाई आग्रह गर्नुभयो ।
अध्यक्ष तिमल्सिनाले प्रतिनिधि सभासँग सम्बन्धित विषय भए पनि बैठकमा कुरा उठ्नु स्वाभाविक भएको र यो विषय समयसँगै निरुपण हुने बताउनुभयो ।
एमालेका सांसदलाई अवरोध नगरी बैठक सञ्चालनमा सहयोग गर्न आग्रह गर्दासमेत उहाँहरूले उभिएर विरोध जनाएपछि अध्यक्ष तिमल्सिनाले भने कार्यसूचीलाई अगाडि बढाउनुभएको थियो ।
बैठकमा अवरोधकै माझ विधान व्यवस्थापन समितिका सभापति पर्शुराम मेघी गुरुङको तर्फबाट समितिका सदस्य ठगेन्द्रप्रकाश पुरीले प्रतिनिधि सभाबाट सन्देशसहित प्राप्त लोक सेवा आयोग विधेयक–२०७५ सम्बन्धी समितिको प्रतिवेदन पेस गर्नुभएको थियो ।
