काठमाडौं । संखुवासभामा एकै परिवारका ६ जनाको हत्या भएको छ । परिवारका ९० वर्षीय वृद्ध मात्रै जिवित छन् । आइतबार राति परिवारका ६ जनाको हत्या भएको हो ।
मादी नगरपालिका १ का ८४ वर्षीया पार्वती कार्की, ५२ वर्षीय तेज बहादुर कार्की, ५२ वर्षीया कमला कार्की, ३२ वर्षीया रञ्जना कार्की, ११ वर्षीय दिपेन कार्की र ७ वर्षीया गोमा कार्कीको हत्या भएको प्रहरीले जनाएको छ ।
परिवारका सबै सदस्यको हत्या भएपनि ९० वर्षीय वृद्धले भने केही थाहा नपाएको बताएका छन् ।
मादी नगरपालिका १ का वडाध्यक्ष खेमनाथ कटुवालले ९० वर्षीय बौद्धमान कार्कीले घटना बारे आफूलाई केही थाहा नभएको बताएका जानकारी दिनुभयो । बौद्धमान राम्रोसँग कान सुन्दैनन् भने आँखा पनि देख्दैनन् ।
रन्जनाका श्रीमान विदेशमा रहेको वडाअध्यक्ष कटुवालले बताउनुभयो ।
वडाध्यक्ष कटुवालका अनुसार बौद्धमान साँझैमा खाना खाएर सुतेका थिए । बिहान छिमेकीले भनेपछि मात्रै उनले घटनाबारे जानकारी पाएको बताएका छन् ।
लासको प्रकृति हेर्दा लखेटि लखेटि हत्या गरेको प्रहरीको अनुमान छ । एउटा शव बाटोमा, एउटा शव घरभित्र, दुई वटा शव बारीको कान्लामा र बाँकी दुई वटा शव खोल्सामा भेटिएका छन् ।
अहिले जिल्ला प्रहरी कार्यालय संखुवासभाका प्रमुख डीएसपी लालध्वज सुवेदीसहितको टोली पनि घटनास्थलमा पुगेको छ ।
अनुसन्धानका लागि फरेन्सिक विज्ञ र कुकुरसहितको टोलि पनि घटनास्थलतर्फ प्रस्थान गरेको छ ।
६ जनाको शव फेला परेको खबर आए पनि कसले र किन गर्यो भन्ने खुलेको छैन । धारिलो हतियार प्रहार गरेर हत्या गरेको जानकारी आएको डीएसपी सुवेदीले बताए ।
