काठमाडौं । राष्ट्रिय जनमोर्चाले बाढीपहिरोबाट पछिल्लो दिनमा भइरहेको जनधनको क्षतिप्रति दुःख व्यक्त गरेको छ ।

अध्यक्ष चित्रबहादुर केसीले शनिबार एक विज्ञप्ति प्रकाशित गरी बाढी तथा पहिरोबाट पीडित जनतालाई राहत तथा अवरुद्ध विद्युत, सडक जस्ता भौतिक संरचना पुनर्निर्माणमा ध्यान दिन सरकारसँग आग्रह गर्नुभएको छ ।

विज्ञप्तिमा भनिएको छ, ‘देशमा र विशेष गरी पर्वत जिल्लामा गत २ दिनको अविरल वर्षाका कारणले बाढी पहिरोमा परेर र कतिपय ठाउँमा सडक दुर्घटनामा परेर दर्जनौँ मानिसहरुको मृत्यु भएको छ । कतिपय घाइते बनी उपचार गराएको स्थिति छ । अविरल वर्षा, बाढी, पहिरो आदि कारणले ती क्षेत्रमा विद्युत, संचार, यातायात सेवा अवरुद्ध भई जनजीवन कष्टकर बनेको छ ।

हामीले मृतकहरुप्रति हार्दिक श्रद्धाञ्जली व्यक्त गर्दछौँ । तिनका परिवारजनप्रति समवेदना प्रकट गर्दछौँ । घाइतेहरुको शीघ्र स्वास्थ्यलाभको कामना गर्दछौँ । मृतक तथा घाइते व्यक्तिका परिवारहरुलाई राहत दिन, घाइतेको उपचार गर्न र अवरुद्ध विद्युत प्रशारण, संचार तथा यातायात सेवाहरुलाई छिटोभन्दा छिटो सञ्चालन गर्न सरकारसहित सम्बन्धित सबै निकायहरुको ध्यानाकर्षण गराउँछौँ ।’