काठमाडौं । भारतीय सुरक्षाकर्मीले तुइन चुँडाइदिँदा महाकाली नदीमा बेपत्ता बनेका जयसिंह धामीको घटनालाई सरकारले थामथुम पार्न खोजेको प्रतिपक्षी नेकपा (एमाले)ले आरोप लगाएको छ ।
प्रवक्ता प्रदीप ज्ञवाली बिहीबार विज्ञप्ति प्रकाशित गरी सरकारले गठन गरेको छानबिन समितिले लामो समयपछि अस्पष्ट प्रतिवेदन बुझाएको भन्दै सरकार यो घटनालाई थामथुम पार्ने प्रयासमा लागेको बताउनुभएको छ ।
‘गतः २०७८ साउन १५ गते महाकाली नदी पार गर्ने क्रममा भारतीय सीमा सुरक्षा बलका सुरक्षाकर्मीले तुइन चुँडाइदिएर जयसिंह धामी महाकाली नदीमा वेपत्ता भएको एक महिनाभन्दा बढी समय बितेको छ’ विज्ञप्तिमा भनिएको छ, ‘यस विषयमा छानबिन गर्न गठित समितिको म्याद पटक–पटक थपेर निकै ढिलो गरी प्रतिवेदन बुझाइए पनि प्रतिवेदन अस्पष्ट रहेको र सरकार यस घटनालाई थामथुम गर्ने प्रयाशमा लागेको देखिएको छ ।’
एमालेले यस्तो गम्भीर विषयमा सरकारले संवेदनहीनता र लाचारी प्रदर्शन गरेको भन्दै खेद व्यक्त गरेको छ। यस्तै, घटनाबारे सत्यतथ्य सार्वजनिक गर्न, दोषीलाई कारबाही र पीडित परिवारलाई उचित क्षतिपुर्ती दिनसमेत एमालेले माग गरेको छ ।
प्रवक्ता ज्ञवालीले भन्नुभएको छ्, ‘आफ्ना नागरिक वेपत्ता पारिएको यति संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता र कूटनीतिक पहल गर्न नसक्ने सरकारले नेपाली जनताको ध्यान यस घटनाबाट अन्यत्रै मोड्न खोजेको आशङ्का पैदा भएको छ ।’
