रिसव आचार्य, तौलिहवा ।
राष्ट्रिय जनमोर्चा कपिलवस्तुका क्रियाशील सदस्य लोकमणि आचार्यको ७८ वर्षको उमेरमा मृत्यु भएको छ । वाणगङ्गा नपा–५ सिमलखोर निवासी आचार्यको आज बिहान मृत्यु भएको हो ।
उहाँको आजै दाहसंस्कार पनि गरिएको छ । दाहसंस्कारको क्रममा राजमोले शोकसभासमेत सम्पन्न गरिएको थियो ।
शोकसभाको सञ्चालन राजमो नेता ऋषिराम शर्माले गर्नुभएको थियोे । नेता आचार्यको पार्थिव शरीरमा राजमो कपिलवस्तु जिल्ला उपाध्यक्ष रामप्रसाद बेल्बासेले राजमोको झन्डा ओढाएर सम्मान गर्नुभएको थियोे । अन्तिम श्रद्धाञ्जलीको क्रममा एक मिनेट मौनधारण गरिएको थियोे ।
बुबा लालमणि आचार्य र आमा बेलादेवी आचार्यको कोखबाट २००१ सालमा प्युठान जिल्लाको हालको ऐरावती गाउँपालिका ६ मा जन्मनुभएका आचार्य पञ्चायत कालदेखि नै राजमोको राजनीति सकृय रूपमा लाग्नुभएको थियोे । पछि २०२९ सालमा प्युठानबाट बसाइँसराइ गरी कपिलवस्तु जिल्लाको हाल बाणगङ्गा नपा–५ सिमलखोरमा आउनुभएको थियोे । कपिलवस्तु आएपछि पनि राजमोको राजनीतिमा सकृयताका साथ कम्युनिस्ट आन्दोलनलाई अगाडि बढाउन ठुलो भूमिका रहेको थियोे ।
उहाँ राष्ट्रिय जनमोर्चाका कपिलवस्तु जिल्लाध्यक्ष दधिराम आचार्यका जेठा दाजु हुनुहुन्थ्यो । उहाँ परिवारको तीन भाइ र दुई बहिनीको जेठो दाजु हुनुहुन्थ्यो ।
