काठमाडौं । नेकपा एमालेका प्रवक्ता प्रदीपकुमार ज्ञवालीले पार्टी एकताको च्याप्टर क्लोज भएको बताउनुभएको छ । नेपाली रेडियो नेटवर्कको कार्यक्रम नेपाली बहसमा उहाँले एकताको च्याप्टर क्लोज भएको बताउनुभएको हो ।
उहाँले एमालेमा केपी ओलीको विकल्प नभएको पनिदाबी गर्नुभयो । विभाजनको कारक ओली नभएर माधव नेपाल नै भएको ज्ञवालीको दाबी थियो ।
‘हिजो माधव नेपाल पार्टी प्रमुख भएका बेला २४० मा सिटमा चुनाव लड्दा ३३ सिटमा खुम्चिएको होइन ? माधव नेपाल आफैं काठमाडौं र रौतहटमा दुई ठाउँमा हारेको होइन ?’ उहाँले भन्नुभयो, ‘अघिल्लो निर्वाचनमा केपी ओली अध्यक्ष हुँदा ९७ सिटमा लडेर ८० सिट पाएको होइन एमालेले ? एमालेलाई राष्ट्रिय राजनीतिको केन्द्रमा स्थापित कसले गरेको हो ओलीले कि माधव नेपालले ?’
आफ्नो घरमा आगो लगाउने त्यसपछि ठूलो घर बनाउने दाबी हास्यास्पद भएको पनि उहाँले बताउनुभयो । विगतमा माधव नेपालको पक्षमा रहेका स्थायी कमिटीका १० जना सदस्य पनि सामेल भएपछि १० बुँदे सहमति कार्यान्वयन भएको ज्ञवालीको तर्क छ ।
नेता ज्ञवालीले माधव नेपालको नयाँ पार्टीको एकमात्र उद्देश्य केपी ओलीको विरोध रहेको दाबी गर्नुभयो । पार्टीविभाजन गरेर माधव नेपाल सफल नहुने उहाँको भनाई छ।
उहाँले भन्नुभयो, ‘आफ्नै पार्टीको बहुमतको सरकार गिराएर कांग्रेसको सरकार बनाउन निर्णायक भूमिका निर्वाह गर्नुभयो । अब कांग्रेससँगै सहकार्य गरेर गए भैहाल्थ्यो । किन नयाँ पार्टी खोल्ने ? व्यक्तिविशेषको आवेश र जलनले कुनै पार्टी बन्दैन र चल्दैन । अब धेरै समय कुर्नुपर्दैन । यो गन्तव्यमा पुगिने बाटो होइन ।’
