काठमाडौं । प्रधानमन्त्री शेरबहादुर देउवासँग भारतको सत्तारुढ दल भारतीय जनता पार्टी (भाजपा) उच्च नेताले भेटवार्ता गरेका छन् । भाजपा विदेश विभाग प्रमुख विजय चौथाइवालेले प्रधानमन्त्री देउवासहित सत्तारुढ कांग्रेसका शीर्ष नेताहरूसँग भेटवार्ता गरेका हुन् ।
भाजपा नेता चौथाइवालेले आइतबार प्रधानमन्त्री देउवासँग सरकारी निवास बालुवाटारमा भेटवार्ता गरेका नेपाली कांग्रेसका सहमहामन्त्री डा. प्रकाशशरण महतले जानकारी दिनुभएको छ । उनी महतको निमन्त्रणमा नेपाल आएका हुन् ।
डा. महतले भाजपाका विदेश विभाग प्रमुख चौथाइवाले र प्रधानमन्त्री देउवाबीच बालुवाटारमा भएको भेटको तस्बिर सामाजिक सञ्जाल ट्विटरमा सार्वजनिक गर्दै भनेका छन्, ‘मलाई विश्वास छ कि यो बैठक एक नयाँ सुरुवात हुनेछ।’
कांग्रेस सभापति देउवा प्रधानमन्त्री भएपछि भारतीय संस्थापन पक्षबाट भेट गर्न आउने चौथाइवाले उच्च नेता हुन् । शेरबहादुर देउवा प्रधानमन्त्री भएपछि भारतले तत्काल बधाई दिएको थिएन । उहाँले विश्वासको मत प्राप्त गरेपछि मात्रै भारतका प्रधानमन्त्री नरेन्द्र मोदीले ट्विटमार्फत बधाई दिएका थिए ।
