काठमाडौं । महाकाली नदीमा तुइन तर्ने क्रममा बेपत्ता भएका दार्चुलाका जयसिंह धामीको न्यायका लागि सुदूरपश्चिममा नौ हजार ५०० हस्ताक्षर सङ्कलन गरिएको छ ।
डडेल्धुरा, कञ्चनपुर, कैलाली र दार्चुलामा हस्ताक्षर सङ्कलन गरिएको जरोकिलो पार्टीका सुदूरपश्चिम प्रदेश अध्यक्ष खिमानन्द जोशीले बताउनुभयो ।
‘वेपत्ता धामीको शव खोज्नुपर्ने, घटनाको अनुसन्धान गरी जानकारी गराउनुपर्ने र परिवारलाई क्षतिपूर्ति उपलब्ध गराउनु पर्ने माग राख्दै हस्ताक्षर अभियान सञ्चालन गरेका हौँ’, उहाँले भन्नुभयो, ‘सङ्कलित हस्ताक्षर प्रधानमन्त्रीलाई बुझाउँछौँ ।’
ड्रोन क्यामेराका सहयोगमा धामीको शव खोज्ने कार्य गरिए पनि फेला पार्न सकिएको छैन ।
गएको साउन १५ गते वैदेशिक रोजगारीका लागि काठमाडौं आउनेक्रममा महाकाली तर्दातर्दै भारतीय एसएसबीले तुइन काटिदिएपछि जयसिंह धामी महाकालीमा बेपत्ता भएका थिए । प्रत्यक्षदर्शीले भारतीय सीमा सुरक्षा बलका जवानहरूले तुइन काटेपछि धामी महाकालीमा खसेको बताएका छन् ।
घटनाबारे सत्यतथ्य छानबिन गर्न गठित सरकारी टोलीले अझै प्रतिवेदन बुझाएको छैन । धामी अझै बेपत्ता छन् तर भारतीयपक्षले उनको खोजीका लागि समेत महाकाली नदीमाथि भारतीय किनारातर्फत ड्रोन उडाउन दिएको छैन।
