काठमाडौँ । निर्वाचन आयोगमा वैधानिक रूपमा दर्ता कायम रहेका राजनीतिक दल ९५ वटा देखिएका छन् । त्यस्तै, कानुनी हैसियत समाप्त भएका ४१ राजनीतिक दलको मान्यता भने खारेज भएको छ ।
आयोगले हाल कायम राजनीतिक दलको नाम, पार्टीको चिह्न वा लोगो, चुनाव चिह्न, दर्ता नम्बर र सम्पर्क ठेगानासहितको विवरण सार्वजनिक गरेको हो ।
आयोगले सार्वजनिक गरेको सूचीमा लगातार तीन वर्षसम्म लेखापरीक्षण प्रतिवेदनलगायत कानुनले तोकेको मापदण्ड पालना नगर्ने ४१ वटा दल खारेजीमा परेका हुन् ।
नेपालका प्रमुख राजनीतिक दलमध्ये नेकपा (एमाले) नम्बर ३२औँ क्रममा, नेपाली काङ्ग्रेस ३८औँ क्रममा, नेकपा (माओवादी–केन्द्र) ३७औँ क्रममा र राष्ट्रिय जनमोर्चा ४१ औँ क्रममा रहेका छन् ।
यसअघि आयोगमा दर्ता भएका राजनीतिक दल १३६ थिए । हाल नामै नसुनिएका लगायत ४१ वटा राजनीतिक दल खारेजीपछि पनि ९५ विभिन्न दल कायम रहेका छन् ।
आयोगमा दर्ता कायम रहेका दलहरूले केन्द्रीय समिति समावेशी प्रकारको हुनुपर्ने, निश्चित अवधिमा सम्मेलन भएको हुनुपर्ने, सङ्घीय संरचनाअनुसार सङ्गठनको तह कायम हुनुपर्ने, पार्टीको सम्पूर्ण आयव्यय विवरण खुल्ने गरी लेखा राख्नुपर्ने, आर्थिक वर्ष समाप्त भएको ६ महिनाभित्र लेखापरीक्षण गराई आयोगमा पेस गरिसक्नुपर्ने लगायत व्यवस्था राजनीतिक दलसम्बन्धी ऐन–२०७३ मा रहेको छ ।
यी नियम लागु नगर्ने दललाई आयोगले ४५ दिनभित्र स्पष्टीकरण पेस गर्न सूचना जारी गर्ने र दलहरूले स्पष्टीकरण पेस नगरी अटेर गरेमा दल दर्ता खारेज हुने व्यवस्था छ ।
यस्तो छ, हाल कायम रहेका दलहरूको सूची
