काठमाडौं । नेकपा (एमाले) फुटाउन सरकारले अध्यादेश ल्याउने तयारी गरेको छ । संसदीय दल र केन्द्रीय समिति दुवैमा ४० प्रतिशत चाहिने प्रावधान हटाएर दुईमध्ये एकमा २५ देखि ३० प्रतिशत भए पुग्ने गरी दल विभाजनसम्बन्धी अध्यादेश ल्याउने तयारीमा सरकार लागेको छ ।
संसद अधिवेशन अन्त्य गरेर सरकारले एमालेलाई फुटाउने योजना सहित दल विभाजनसम्बन्धी अध्यादेश ल्याउने तयारी गरेपछि राजनीतिक वृत्तमा तरंग आएको छ ।
विभाजनविरुद्ध उभिन ओलीको अपिल
अध्यादेश ल्याउने थाहा पाएलगत्तै एमाले अध्यक्ष केपी शर्मा ओलीले आफूनिकट नेताहरुलाई बालकोटमा बोलाएर बैठक गर्नुभएको थियो । पदाधिकारी, स्थायी कमिटी सदस्य र केन्द्रीय कमिटी सदस्यहरूसँगको बैठकपछि ओलीले सोमवार राति नै दुई पृष्ठ लामो पाँच बुँदे विज्ञप्ति सार्वजनिक गर्नुभएको छ ।
अध्यक्ष ओलीले पार्टीका नेता, कार्यकतालाई पार्टी विभाजनका प्रयासविरुद्ध दृढताका साथ उभिन अपिल गर्नुभएको छ । वक्तव्यमा भनिएको छ, ‘एमाले र यस पार्टीको संसदीय दलमा विभाजन गर्ने कुनै पनि बहाना मान्य हुन सक्तैन ।’
उहाँले विसं २०७७ फागुन २३ गतेको सर्वोच्च अदालतको फैसलापछि पनि नेपाल कम्युनिष्ट पार्टी (नेकपा) लाई एकताबद्ध राख्न हरसम्भव कोसिस गरेको उल्लेख गर्दै त्यो सम्भव नभएपछि एमालेलाई नेकपाको विरासतसहितको एकीकृत पार्टीका रूपमा विकास गर्न केन्द्रित भएको बताउनुभएको छ ।
एमालेलाई एकीकृत गर्ने क्रममा पार्टीभित्र उत्पन्न समस्याको समाधानका लागि कार्यदल गठन गरिएको र कार्यदलले निकै लामो प्रयासपछि गत असार २७ गते १० बुँदे प्रस्ताव प्रस्तुत गरेको र उक्त प्रस्तावलाई ग्रहण र अनुमोदन गर्दै कार्यान्वयन गर्ने निर्णय गरिसकेको उल्लेख गर्नुभएको छ ।
उहाँले क्रान्तिकारी र अग्रगामी सारतत्वका साथ राष्ट्रिय राजनीतिमा नेतृत्वदायी भूमिका निर्वाह गरिरहेको हाम्रो पार्टीको भूमिका यतिबेला सत्तापक्षबाट प्रतिपक्षमा परिवर्तित भएको उल्लेख गर्दै यस धक्काबाट उठेर पार्टीलाई पुनः राष्ट्रिय राजनीतिको नेतृत्वदायी शक्तिमा स्थापित गर्न नेता, कार्यकर्तालाई अनुशासित र सक्रिय भूमिका निर्वाह गर्नुहुन अपिलसमेत गर्नुभएको छ ।
उहाँले आफू पार्टीका सम्पूर्ण नेता, कार्यकर्ता र सदस्यहरुप्रति विभेद र पूर्वाग्रहमा होइन, समभावमा विश्वास गर्दै सबैलाई सम्मानका साथ पार्टी कामका जुट्ने अनुकूल परिस्थिति निर्माण हुनुपर्दछ भन्ने मानेको समेत बताउनुभयो ।
‘पार्टीलाई अनुशासित, एकताबद्ध एवं गतिशील तुल्याउन र राष्ट्रिय राजनीतिमा यस पार्टीको नेतृत्वदायी भूमिका सुनिश्चि गर्न पार्टीका सम्पूर्ण नेता, कार्यकर्ता र सदस्यलाई आह्वान गर्दछु’, उहाँले जारी गर्नुभएको विज्ञप्तिमा भनिएको छ, ’पार्टीका स्थायी कमिटी, केन्द्रीय कमिटीलगायत आफूसम्वद्ध कमिटीका बैठकमा सरिक हुन र आ–आफ्नो तहबाट पार्टी निर्माणमा योगदान गर्न अपिल गर्दछु ।’
एकै दिन दुई बैठक
दल विभाजनसम्बन्धी अध्यादेश आउनै लाग्दा एमालेले आज एकै दिन स्थायी कमिटी र संसदीय दलको बैठक राख्ने भएको छ। अध्यक्ष केपी शर्मा ओलीको निवास (बालकोट) मा सोमबार रातिसम्म बसेको शीर्ष नेताहरूको अनौपचारिक बैठकले स्थायी कमिटी र संसदीय दलका बैठक मंगलबार राख्ने निर्णय गरेको प्रमुख सचेतक विशाल भट्टराईले जानकारी दिनुभयो ।
उहाँका अनुसार स्थायी कमिटीको बैठक अहिले बिहान ११ बजे ललितपुरस्थित तुल्सीलाल स्मृति प्रतिष्ठानको भवन तथा संसदीय दलको बैठक दिउँसो ३ बजे नयाँ बानेश्वरस्थित संघीय संसद् भवन परिसरमा बस्नेछन्।
