काठमाडौं । लुम्बिनी प्रदेश सरकारले मिर्गौला, क्यान्सर र मुटु रोगका बिरामीलाई रु दुई लाख आर्थिक सहयोग गर्ने निर्णय गरेको छ । बिहीबार नयाँ गठन भएको मन्त्रिपरिषद्को पहिलो बैठकले यसअघि उपचारका लागि रु एक लाख पाइरहेका बिरामीलाई थप रकम सहयोग गर्ने निर्णय गरेको हो ।
यस्तै सरकारले कोभिड–१९ का बिरामीको उद्धार गर्न हटलाइन र एम्बुलेन्सको व्यवस्था गर्ने र त्यस्तो खर्च प्रदेश सरकारले बेहोर्ने निर्णय गरेको छ ।
बैठकले कोराना प्रभावित क्षेत्रमा स्वास्थ्य शिविरमार्फत एन्टिजेन परीक्षणको व्यवस्था गरी कोभिड प्रभावितको उपचार र उद्धार गर्ने र कोभिड–१९ विरुद्धको खोप वितरण प्रणालीलाई प्रभावकारी बनाई प्रदेशवासी जनतालाई खोपको सुनिश्चितता गर्न विशेष व्यवस्था गर्ने निर्णय गरेको छ ।
यसैगरी बैठकले मातृ मृत्युदर कम गर्न लुम्बिनी प्रदेशका स्थानीय तहको भागको आधारमा एकएक वटा पोर्टेबल अल्ट्रासाउण्ड मेसिनसहित तालिम प्राप्त नर्सको व्यवस्था गर्ने निर्णय गरेको छ । बैठकले प्रदेश सरकारको प्रवक्तामा आर्थिक मामिला तथा योजनामन्त्री कृष्णध्वज खड्का र मुख्यमन्त्रीको प्रमुख सल्लाहकारमा अमरबहादुर डाँगीलाई नियुक्त गरेको छ ।
को को बने मन्त्री ?
लुम्बिनी प्रदेशको मुख्यमन्त्री पद सम्हालेकै दिन कुलप्रसाद केसी मन्त्रिमण्डल बनाउनुभएको छ । उहाँले मुख्यमन्त्रीको शपथ लिएकै दिन बिहीबार ६ जना मन्त्रीले शपथ लिएका छन् ।
माओवादी केन्द्र, नेपाली कांग्रेस, जनता समाजवादी पार्टी र सूर्य चिन्हबाट लडेका सांसदले मन्त्री पदको सपथ लिएका हुन् । सरकारलाई समर्थन गरेको राष्ट्रिय जनमोर्चा भने विपक्षमा बस्ने स्पष्ट पारेको छ ।
नेपाली कांग्रेसबाट ग्रामीण तथा शहरी विकास मन्त्रीमा डिल्ली चौधरी, माओवादी केन्द्रबाट आर्थिक मामिला मन्त्रीमा कृष्णध्वज खड्का, जनता समाजवादी पार्टीबाट भौतिक पूर्वाधार विकास मन्त्रीको जिम्मेवारी सहसराम यादव नियुक्त हुनुभएको छ भने विना विभागीय मन्त्रीका रुपमा सूर्य चिन्हबाट चुनाव लडेका अजय शाही, जसपाकी सुमन शर्मा रायमाझी र पुर्मती ढेंगाले पनि सपथ लिनुभएको छ ।
