काठमाडौँ । पूर्व प्रधानमन्त्री तथा नेकपा (एमाले) का अध्यक्ष केपी शर्मा ओलीले प्रधानमन्त्रीबाट हट्नुपरेकोमा आफूलाई चिन्ता नभएको बताउनुभयो ।
प्रतिनिधि सभाको २०७८ साउन २६ गतेको बैठकमा विशेष समय मागेर बोल्दै एमाले अध्यक्ष ओलीले यस्तो दावी गर्नुभएको हो ।
मन्तव्यको क्रममा उहाँले अदालतको निर्णयमाथि बहस हुँदै जाने बताउनुभयो ।
‘प्रधानमन्त्रीबाट हट्नुपरेकोमा मलाई चिन्ता छैन’ उहाँले भन्नुभयो– ‘अदालतजस्तो सबैले विश्वास गर्ने जनताको भरोसाको संस्था असन्तुलित नहोस् भन्नेमा मात्रै मेरो चिन्ता हो ।’
उहाँले अगाडि भन्नुभयो– ‘लोकतान्त्रिक प्रणालीका संस्था आआफ्नो मर्यादामा बसेर काम गरोस् भन्नेमा मात्रै मलाई चिन्ता छ ।’
नेता ओलीले आफू काम गर्दै जाँदा प्रधानमन्त्री भएको र अब पनि जनताको जनमतमार्फत मूलढोकाबाटै सरकारमा सहभागी अपेक्षा गर्नुभयो ।
आफूमाथि विश्वास गरेर सुम्पिएको जिम्मेवारी खोसिएको दाबी गर्दै उहाँले राजनीतिमा कहिलेकाहिँ यस्तो हुने बताउनुभयो ।
सरकारको न्यूनतम साझा कार्यक्रमको सन्दर्भमा अध्यक्ष ओलीले संसद छलेर उक्त कार्यक्रम किन आयो भनी प्रश्न गर्नुभयो ।
अर्कातर्फ, मिलेनियम च्यालेन्ज कर्पाेरेसन (एमसिसी) बारेमा नेपाली जनताले जान्न चाहेको उल्लेख गर्दै अध्यक्ष ओलीले भन्नुभयो– ‘प्रधानमन्त्रीज्यू, एमससिसीको बारेमा के गर्नुहुन्छ ?’
उहाँले प्रधानमन्त्रीसित प्रश्न सोध्नुभयो– ‘लिम्पियाधुरा, लिपुलेक, कालापानी वार्ताद्वारा फिर्ता ल्याउँछु भनेर किन भन्न सक्नुभएन ?’
