काठमाडौँ । राष्ट्रियसभाको २०७८ साउन २६ गतेको बैठकले “खाद्य स्वच्छता तथा गुणस्तर विधेयक–२०७७” स्वीकृत गरेको छ ।
प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले उक्त विधेकलाई विचार गरियोस् भनी प्रस्तुत गर्नुभएको प्रस्तावलाई बैठकको सर्वसम्मतिले स्वीकृत गरेको हो ।
उक्त प्रस्तावमाथिको छलफलमा नेपाली काङ्ग्रेसका प्रकाश पन्त र अनिता देवकोटा तथा नेकपा (माओवादी–केन्द्र) का रामनारायण विडारी र मायाप्रसाद शर्माले भाग लिनुभएको थियो ।
प्रतिपक्षी दल नेकपा (एमाले) का खिमलाल भट्टराई, ठगेन्द्रप्रसाद पुरी, गङ्गाकुमारी बेल्वासे, उदया शर्मा पौडेल, डा बिमला पौडेल राई तथा स्वतन्त्र सांसद खिमलाल देवकोटाले विधेयकमाथि धारणा राख्नुभएको थियो । विधेयकमाथि सांसदले उठाउनु भएका जिज्ञासाको मन्त्री कार्कीले जवाफसमेत दिनुभएको थियो ।
रेल्वे विधेयक–२०७६ पेस
राष्ट्रियसभामा “रेल्वे विधेयक–२०७६” सम्बन्धी प्रतिवेदन पेस गरिएको छ । विधायन व्यवस्थापन समितिका सभापति परशुराम मेघी गुरुङले सभा समक्ष उक्त प्रतिवेदन पेस गर्नुभएको हो ।
त्यस्तै, गुरुङले “प्रत्यायन (एक्रिडिटेसन) विधेयक–२०७६” सम्बन्धी समितिको प्रतिवेदन राष्ट्रियसभासमक्ष पेस गर्नुभयो । त्यसैगरी, प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले “सार्वजनिक सेवा प्रसारण विधेयक–२०७७” राष्ट्रियसभासमक्ष पेस गर्नुभयो ।
स्टान्डर्ड नाप र तौल (पाँचौँ संशोधन) विधेयक–२०७८ पारित
राष्ट्रियसभाको साउन २६ गतेको बैठकले “स्टान्डर्ड नाप र तौल (पाँचौँ संशोधन) विधेयक–२०७८” लाई सर्वसम्मतिले पारित गरेको छ ।
प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले उक्त विधेयकलाई पारित गरियोस् भन्दै बैठकमा प्रस्ताव प्रस्तुत गर्नुभएको थियो ।
सो विधेयकलाई पारित गर्नुपूर्व बैठकमा विधेयक उपर विधायन व्यवस्थापन समितिको प्रतिवेदनसहित छलफल भएको थियो ।
विधेयकमाथिको छलफलमा भाग लिँदै नेकपा एमालेका सांसद कोमल वलीले आफ्नो धारणा राख्नुभएको थियो भने छलफलमा उठेका प्रश्नको मन्त्री कार्कीले जवाफ दिनुभएको थियो ।
