काठमाडौं । नेपालका लागि अमेरिकी राजदूत र्याण्डी बेरीले भेटघाट तीब्र बनाएका छन् । सोमबार राजदूत बेरीले पूर्वप्रधानमन्त्री एवम् नेकपा (एमाले) का अध्यक्ष केपी ओली र ऊर्जा, जलस्रोत तथा सिंचाइमन्त्री पम्फा भुसालसँग शिष्टाचार भेट गरेका छन् ।
उजामन्त्री भुसालसँगको भेटमा राजदूत बेरीले ऊर्जाको विकासका लागि मिलिनियम च्यालेञ्ज कर्पोरेसन (एमसीसी) महत्वपूर्ण रहेको उल्लेख गर्दै त्यसलाई अगाडि बढाउन पहल गरिदिन आग्रह गरे ।
एससीसी नयाँ कार्यक्रम नभएको र यस विषयमा आफूहरू स्पष्ट पार्न तयार रहेको बताउँदै भने, ‘एमसीसीबारे कुनै पनि कुरा प्रष्ट पार्न हामी तयार छौँ, यसको उद्देश्य सीप र ज्ञान हस्तान्तरण गर्नु हो ।’
जवाफमा मन्त्री भुसालले नेपालको विकास निर्माण र विपद्का बेला अमेरिकी सरकार र जनताले पुर्याएको सहयोगप्रति धन्यवाद व्यक्त गरिन् । एमसीसीबारे राजदूतले गरेको आग्रहप्रति मन्त्री भुसालले जनता र राष्ट्रको हितमा नेपालले सहयोग स्वीकार गर्ने बताइन् ।
‘अमेरिकी सरकारले कोभिड–१९ विरुद्धको खोप उपलब्ध गराएर सहयोग गरेको छ, त्यसप्रति हार्दिक धन्यवाद छ’ उनले भनिन्, ‘एमसीसीको विषयमा पार्टी, सरकार र संसद्ले निर्णय लिन्छ, त्यो विषयमा उपयुक्त समयमा छलफल होला ।’
सो अवसरमा राजदूत बेरीले ऊर्जा एवं जलस्रोतका क्षेत्रमा नेपाललाई आफ्नो देशको आर्थिक तथा प्राविधिक सहयोग रहेको बताउँदै आगामी दिनमा थप सहकार्य हुने विश्वास व्यक्त गरे ।
यता, नेकपा एमालेका अध्यक्ष तथा पूर्वप्रधानमन्त्री केपी ओलीसँगको भेटवार्तामा पनि बेरीले एमसीसी स्वीकार गर्न आग्रह गरेका छन् । सोमबार दिउँसो बालकोटस्थित ओली निवास पुगेर बेरीले भेटघाट गरेका हुन् ।
ओली निकट एमालेका एक नेताका अनुसार एमसीसी अनुमोदन बारे उनीहरुबीच छलफल भएको थियो । जवाफमा ओलीले एमसीसीलाई संशोधन गरेर संसदबाट पास गराउने बताएको एक नेताले बताए ।
उनीहरुबीच समसामयिक राजनीतिक घटनाक्रमबारे छलफल भएको थियो । प्रधानमन्त्री पदबाट हटेपछि नेता ओलीले पहिलो पटक अमेरिकी अधिकारीसँग भेटवार्ता गरेका हुन् ।
