काठमाडौँ । २७औँ विश्व आदिवासी दिवस (अगस्त ९) को अवसरमा अखिल नेपाल जनजाति सम्मेलनले शुभकामना सन्देश प्रवाह गरेको छ । आजै अर्थात् अगस्त ९ (२०७८ साउन २५ गते) का दिन सम्मेलनको तर्फबाट अध्यक्ष निमबहादुर बुढाथोकी मगरले शुभकामना सन्देश व्यक्त गर्नुभएको हो ।
शुभकामना सन्देशमा आज पनि विश्वभरिका आदिवासी जनजातिमाथि भेदभाव, उपेक्षा र असमान व्यवहार भइरहेको बताउँदै सही विचार र दृष्टिकोणको आधारमा मुक्ति–आन्दोलन अगाडि बढाउन आग्रह गरिएको छ ।
नेपालको राजनीतिक परिस्थितिमा प्राप्त उपलब्धिको रक्षा गर्दै अघि बढ्न आग्रह गरिएको शुभकामना सन्देशको पूर्ण पाठ यस्तो छ–
“आज अगस्त ९, २०२१ । सर्वप्रथम हाम्रो सङ्गठन अखिल नेपाल जनजाति सम्मेलन केन्द्रीय समितिको तर्फबाट देशभित्र रहनुहुने र वैदेशिक रोजगारका लागि विश्वका विभिन्न मुलुकमा पुग्नुभएका नेपाली आदिवासी जनजाति दाजुभाइ तथा दिदीबहिनीलाई विश्व आदिवासी दिवस–२०२१ को शुभकामना व्यक्त गर्न चाहान्छौँ, साथै उत्तरोत्तर प्रगतिको कमना पनि गर्न चाहान्छौँ ।
संयुक्त राष्ट्र सङ्घद्वारा आयोजित मानवअधिकारको विश्व सम्मेलनको सुझावअनुसार १९९३ डिसेम्बर २१ का दिन संयुक्त राष्ट्र सङ्घको साधारण सभाको पारित प्रस्ताव नं ४८÷१६३ ले विश्वभरिका आदिवासी जनजातिको समस्याप्रति राज्यको ध्यानाकर्षण गर्नका लागि १९९५–२००४ लाई अन्तर्राष्ट्रिय आदिवासी जनजाति दिवस घोषणा गरेको थियो । त्यसका साथै डिसेम्बर २३, १९९४ का दिन राष्ट्र सङ्घको साधारण सभाको पारित प्रस्ताव नं ४९÷२१४ ले अगस्त ९ को दिनलाई विश्व आदिवासी जनजाति दिवसको रूपमा विश्वभर मनाउने निर्णय गरेको थियो । त्यो राष्ट्र सङ्घको आर्थिक तथा सामाजिक परिषद्अन्तर्गत मानवअधिकार संरक्षण तथा सम्बद्र्धन उपआयोगले आदिवासी जनजाति मामिला हेर्ने कार्यदल गठन गरेको थियो । त्यो कार्यदलको औपचारिक बैठक अगस्त ९ मा बसेको दिनलाई महत्त्व दिँदै विश्व आदिवासी जनजाति दिवस मनाउने क्रम विश्वभर प्रचलनमा रहेको छ । त्यही अवसरमा नेपालमा पनि सदा जस्तै विविध कार्यक्रमसहित आयोजना गरी “२७औँ विश्व आदिवासी दिवस मनाउने गइरहेको सन्देश देशभित्र र विश्वका विभिन्न कुनाकाप्चामा रोजगारी वा अन्य व्यवसाय गरी बसिरहनुभएका आम नेपाली आदिवासी जनजाति दाजुभाइ, दिदीबहिनीलाई दिन पाउँदा अखिल नेपाल जनजाति सम्मेलन अत्यन्त हर्षको अनुभूति गर्दछ ।
नेपालको आदिवासी जनजाति समस्या सिङ्गो राष्ट्रको समस्या हो । अझै पनि राज्यले आदिवासी जनजातिमाथि लामो समयदेखि भेदभाव, उपेक्षा र असमान व्यवहार गर्दै आइरहेकाले समस्या झन् जटिल बन्दै गइरहेको छ । यस्तो अवस्थामा हामी आदिवासी जनजातिहरू सही विचार, सही दृष्टिकोणको आधारमा आफ्नो मुक्तिउत्थानका लागि सचेत र सङ्गठित हुनु आजको प्रमुख आवश्यकता भएको छ । नेपालका हामी जनजातिहरू विविध कारणले विशेष गरी रोजगारीको सिलसिलामा विश्वका धेरै देशमा पुगेका छौँ । हामी जहाँ पुगका छौँ, त्यहाँ पनि हाम्रो आफ्नो हक, अधिकार र समस्या समाधानका लागि सचेत र सङ्गठित हुन जरुरी छ । नेपालका आदिवासी जनजातिको समस्याबारे विश्व आदिवासी जनजाति तथा अन्तर्राष्ट्रिय समुदायलाई पनि परिचित गराउँदै उनीहरूसँग सम्पर्क, समन्वय र ऐक्यबद्धता कायम गर्नुपर्ने आवश्यकता छ ।
नेपालका जनजाति विश्वका जुनसुकै ठाउँमा पुगे पनि उनीहरूको सम्बन्ध र समस्याको बारेमा नेपालसँग जोडिएको हुन्छ । त्यसैले नेपालको जुनसुकै राजनीतिक परिस्थिति र आदिवासी जनजातिको समस्या समाधानको दिशामा हुने सकारात्मक प्रयत्न र आन्दोलनसँग जीवित सम्पर्क र सम्बन्ध राख्नका लागि विशेष ध्यान दिन आग्रह गर्न चाहान्छौँ ।
अहिले नेपालको राजनीतिक परिस्थिति प्रतिनिधि सभा पुनस्र्थापना भई सही ट्रयाकमा आएको छ । प्रतिगमनलाई पराजित गर्न जनताद्वारा प्राप्त उपलब्धिलाई समाप्त गर्न फेरि पनि प्रतिगामी तत्त्वहरूले कोसिस गर्ने छन् । अहिले प्राप्त उपलब्धि रक्षाका लागि अझै उच्च प्रकारको सतर्कता अपनाउनुपर्ने आवश्यकता छ । नेपालका आदिवासी जनजातिलाई पनि धर्म निरपेक्षता, समानुपातिक समावेशीजस्ता यी उपलब्धिको रक्षा गर्नका लािग एकजुट भएर प्रतिगमन विरुद्ध लड्न आह्वान गर्दछौँ ।
विश्वव्यापी कोरोना अब मानव समुदायका लागि थपिएको रोग हो । यसबाट आफै सचेत बन्न खोप लगाएर सुरक्षित हुनु र स्वास्थ्य मापदण्ड अपनाउनु अब एक मात्र विकल्प हो भन्ने आह्वान गर्दै देशविदेशमा रहनुभएका आदिवासी जनजाति दाजुभाइ, दिदीबहिनी सबैलाई २७औँ विश्व आदिवासी दिवस–२०२१ को सन्दर्भमा पुनः शुभकामना सन्देश दिन चाहान्छौँ ।”
