काठमाडौं । राष्ट्रिय जनमोर्चा बैतडीका पूर्वअध्यक्ष अर्जुनसिंह मडै पूनः मूल घर राष्ट्रिय जनमोर्चामै फिर्ता हुनुभएको छ । केही वर्षअघि राजमो छोडेर तत्कालिन नेकपामा प्रवेश गरेका मडै हाल नेकपा (माओवादी) केन्द्रमा सक्रिय हुनुहुन्थ्यो ।
तत्कालिन नेकपाले देश र जनताका लागि राम्रो काम गर्ने उत्साहले त्यहाँ प्रवेश गरेको बताउने मडैले एमाले र माओवादीको वास्तविक चरित्र छर्लङ्ग भएपछि त्यहाँ बस्न उचित नलागेर राष्ट्रिय जनमोर्चामै फिर्ता भएको बताउनुभएको छ ।
युगदर्शनसँगको सम्पर्कमा उहाँले भन्नुभयो, ‘नेकपा बनेपछि देश र जनताको भलो हुने सोचेर त्यहाँ गएको थिएँ । तर, एमाले र माओवादीभित्र त पैसा कमाउने, भ्रष्टाचार गर्ने र आफू र आफ्ना आसेपासेलाई सेवा सुविधा, मोजमस्तीका लागि प्रतिष्पर्धा नै हुने रहेछ । राष्ट्रिय जनमोर्चाको स्कुलिङमा राजनीति सिकेको मेरो लागि त्यो सह्य भएन र माओवादी छोडेँ ।’
नेता मडैले मंगलबार एक विज्ञप्ति प्रकाशित गरी आफू पुरानै घरमा फर्किएको र स्पष्ट पार्नुभएको छ ।
विज्ञप्तिमा भनिएको छ,
‘म लामो समयसम्म राष्ट्रिय जनमोर्चामा कार्यरत रही बैतडी जिल्ला अध्यक्षको जिम्मेवारीसमेत सम्हालेको थिएँ । त्यस क्रममा गएको निर्वाचनमा बैतडी जिल्लाबाट प्रदेश सभा सदस्यको रुपमा उम्मेदवारीसमेत दिएको थिएँ । निर्वाचनपछि तत्कालिन नेकपा (एमाले) र माओवादी केन्द्र मिलेर करिब दुई तिहाईको वामपन्थी सरकार निर्माण भयो । ती दुवै पार्टी एकीकृत भइ बनेको नेपाल कम्युनिष्ट पार्टी (नेकपा) प्रति आम जनताको जस्तै मेरो पनि ठूलो भरोसा थियो र त्यसप्रति मेरो आकर्षण बढ्यो । र, मैले राष्ट्रिय जनमोर्चा परित्याग गरी नेकपामा प्रवेश गरेँ ।
तर, राष्ट्रिय जनमोर्चा परित्याग गर्नु मेरो भूल थियो । वास्तवमा नेकपा नीति, सिद्धान्त, संगठनात्मक पद्धती, अनुशासन सबै भद्रगोल रहेछ । देश र जनताको पक्षमा काम गर्नु भन्दा राजनीतिलाई कमाउ धन्दा बनाउने प्रतिष्पर्धा नै हुने रहेछ । भ्रष्टाचार गरेरै भएपनि सम्पत्ती कमाउने, आफ्ना आफन्त तथा आसेपासेहरूलाई पोस्ने कार्यमै नेता कार्यकर्तारूको ध्यान देखिन्छ । सोही कारण दुई तिहाईको जनमत लत्याएर सरकारसमेत असफल भयो ।
नेकपा विघटन भएपछि म माओवादी केन्द्रतिर लागेपनि सो समूहसँग मेरो विचार मिल्न सकेन । र, मैले सो समूह परित्याग गरेँ । पछि राष्ट्रिय जनमोर्चाको केन्द्रीय कार्यालयमा सम्पर्क गरी आफू पुनः मूल घरमै फर्कन चाहेको जानकारी गराएँ । म जस्तै भ्रमवस विभिन्न समूहमा रहेका देशभक्त तथा क्रान्तिकारी साथीहरूलाई विगतमा गरेको गल्ती सच्याउँदै राष्ट्रिय जनमोर्चामै आवद्ध हुन र देश र जनताको पक्षमा क्रियाशील हुन आव्हान गर्दछु ।
अर्जुनसिंह मडै
बैतडी
२०७८/०४/१९
