बागलुङ । ढोरपाटन नगरपालिका–३ मा रहेको घोसाखानी आधारभूत विद्यालयमा शैक्षिक जागरणसम्बन्धी अन्तरक्रिया कार्यक्रम सम्पन्न भएको छ । कार्यक्रममा विद्यालयका प्रधानअध्यापक खुमबहादुर छन्त्यालले अवधारणा पत्र प्रस्तुत गर्नुभएको थियो ।
उक्त अवधारणा पत्रमाथि छलफल गर्दै समाजसेवी गौरीश्वर पाण्डेले व्यक्तिको पहिलो शिक्षा घर परिवार भएको र घर परिवार व्यवस्थित भए समाज र शिक्षा व्यवस्थित हुने बताउनुभयो । उहाँले शैक्षिक जागरणको बहससँगै घोसाखानी स्कुललाई नमूना विद्यालय बनाउदै माध्यमिक तह सञ्चालन गर्नु पर्नेमा जोड दिनु भएको थियो ।
त्यस्तै, स्थानीय युवा ईन्द्रमणि पाण्डेले शिक्षा नै समाज परिवर्तनको आधार भएकोले सामाजिक राजनीतिक र सभ्यताको विकास शिक्षा विना नहुने भन्दै माध्यमिक तह सञ्चालन गर्नुपर्ने धारणा व्यक्त गर्नु भएको थियो । युवा बुद्धिजीवि दिपेन्द्र छन्त्यालले शिक्षा नै समाज परिवर्तनको आधार भएकोले दुर्गम बस्तिमा शिक्षाको ज्योति फैलाउन माध्यमिक विद्यालय खोलेमा ऐतिहासिक काम हुने जिकिर गर्नु भयो ।
कार्यक्रममा लिलाजंग छन्त्याल, रामबहादुर विक, शिक्षक अभिभावक संघका संयोजक लोकबहादुर विक, राजु विक, नगर कार्यपालिका सदस्य वेल कुमारी छन्त्याल विद्यालयका पूर्वप्रधानअध्यापक गंगाबहादुर कार्की , स्थानीय कृष्ण छन्त्याल, ढोरपाटन नगरपालिकाका वन अधिकृत मन कुमार छन्त्याल लगायतले मन्तव्य व्यक्त गर्नु भएको थियो ।
अवधारणा पत्रमा उठेको प्रश्नको जवाफमा छन्त्यालले प्रष्ट पार्नु भएको थियो । साथै उक्त कार्यक्रममा माध्यमिक तह सञ्चालनका लागि लोकबहादुर विकको संयोजकत्वमा ईन्द्रमणि पाण्डे, दिपेन्द्र छन्त्याल खुम बहादुर छन्त्याल खिमबहादुर विक, दलबहादुर विक, सुरेन्द्र घर्ती मगर, विक्रम विक रहेको स्रोत पहिचान समिति समेत गठन गरिएको छ ।
कार्यक्रम विद्यालय व्यवस्थापन समितिका अध्यक्ष खिमबहादुर सुनारको अध्यक्षता, शिक्षिका होम कुमारी छन्त्यालको सञ्चालनमा सम्पन्न भएको थियो।
(चन्द्रकान्त भुसाल, घोसाखानी)
