काठमाडौँ । माओवादी–केन्द्र परित्याग गरी एमाले प्रवेश गरेका चार नेता आफूहरू माओवादी केन्द्रमै रहेको जिकिर गर्दै सर्वोच्च अदालत पुगेका छन् ।
एमाले केन्द्रीय सदस्यहरू टोपबहादुर रायमाझी, लेखराज भट्ट, गौरीशङ्कर चौधरी र प्रभु शाह माओवादीकै सांसद रहन पाऊँ भन्दै सर्वोच्च गएका हुन् ।
सर्वाेच्चका प्रवक्ता बाबुराम दाहालका अनुसार चार सांसदले दायर गरेको रिटमा केन्द्रीय कमिटीबाट निर्णय नगरी अध्यक्षको एकल निर्णयका आधारमा पदमुक्त गर्ने निर्णयमा निर्वाचन आयोगले सदर गर्नु गैरसंवैधानिक भएको जिकिर गरिएको छ । सांसद पदमुक्त गर्ने सिफारिसलाई निर्वाचन आयोगले छानबिन नगरी सिधै हटाइदिएको कुरा स्वीकार गर्न नसकिने रिटमा उल्लेख छ।
कैलाली क्षेत्र नम्बर ४ बाट निर्वाचित लेखराज भट्ट, अर्घाखाँचीबाट निर्वाचित टोपबहादुर रायमाझी, रौतहट ३ बाट निर्वाचित प्रभु साह र कैलाली ३ बाट निर्वाचित गौरीशङ्कर चौधरीलाई माओवादी केन्द्रले चैत २४ गते पदमुक्त गरेको थियो । चैत २६ गते सभामुख अग्निप्रसाद सापकोटाले उनीहरू पदमुक्त भएको जानकारी प्रतिनिधिसभाको बैठकमा गराउनुभएको थियो ।
माओवादी केन्द्र संसदीय दलका नेता पुष्पकमल दाहाल प्रचण्डले अन्य दलको राजनीतिक गतिविधिमा संलग्न भई सो दलको केन्द्रीय सदस्य पद स्वीकार गरी दल त्याग गरेको देखिएकाले राजनीतिक दलसम्बन्धी ऐन २०७३ को दफा ३४ (१) गरिदिन भनेर दल त्यागको सूचना संसद सचिवालयमा दिनुभएको थियो ।
