काठमाडौँ । नेपालमा आयोजना भएको तेह्रौँ दक्षिण एसियाली खेलकुद (साग) अन्तर्गत एथ्लेटिक्स खेलका पदक विजेता खेलाडी २०७८ साउन ११ गते नगदसहित सम्मानित हुनुभएको छ ।
नेपाल एथलेटिक्स सङ्घद्वारा साउन ११ गते आयोजित कार्यक्रममा एथ्लेटिक्सका आठ पदाधिकारी तथा खेलाडी सम्मानित हुनुभएको हो । तेह्रौँ सागअन्तर्गत एथ्लेटिक्समा नेपालले तीन स्वर्णसहित कुल आठ पदक जितेको थियो ।
सागमा सन्तोषी श्रेष्ठ, गोपीचन्द्र पार्की र किरणसिंह बोगटीले नेपाललाई स्वर्णपदक दिलाउनुभएको थियो । सन्तोषीले १० हजार मिटर, गोपीचन्द्र्रीले पाँच हजार मिटर र किरणले म्याराथनमा स्वर्ण जित्नुभएको थियो ।
महिलाको म्याराथनमा पुष्पा भण्डारीले रजत जित्नुभएको थियो । त्यस्तै, सोमबहादुर कुमालले आठ सय मिटर, टङक कार्कीले १५ सय मिटर, हरिकुमार रिमालले पाँच हजार मिटर र दीपक अधिकारीले १० हजार मिटरमा कास्य पदक जित्नुभएको थियो ।
कार्यक्रममा स्वर्ण विजेता खेलाडीले जनही रु एकएक लाख प्राप्त गर्नुभयो । त्यस्तै, रजत पदक विजेता खेलाडीले रु ३५ हजार पाउँदा कास्य पकद विजेताले रु २० हजार प्राप्त गर्नुभयो । पदक विजेता खेलाडीलाई एथलेटिक्स सङ्घका अध्यक्ष राजिवविक्रम शाहलगायतले पुरस्कार प्रदान गर्नुभयो । (रासस)
