काठमाडौँ । राष्ट्रियसभाका सांसदहरूले जतिसक्दो चाँडो सबै नागरिकलाई कोभिड–१९ विरुद्धको खोपको व्यवस्था गर्न आग्रह गरेका छन् ।
सङ्घीय संसद, राष्ट्रियसभाको २०७८ साउन ७ गतेको बैठकको शून्य समयमा सांसदहरूले कोरोना बढेसँगै सुरु गरिएको बन्दाबन्दी खुकुलो भएसँगै भिडभाड बढ्दै गएको सन्दर्भ उल्लेख गर्दै जतिसक्दो चाँडो सबै नागरिकलाई खोपको व्यवस्थ गर्न सरकारसँग आग्रह गरेका हुन् ।
सांसद उदया शर्मा पौडेलले बन्दाबन्दी खुकुलो भएसँगै बढ्दै गएको भिडप्रति चिन्ता व्यक्त गर्नुभयो । उहाँले भन्नुभयो– ‘भारतमा अहिले कोभिडबारे सतर्कता अपनाइएको छ, नेपालमा भिडभाड झन् बढेकोले चिन्ता बढाएको छ । सार्वजनिक यातायातमा स्यानिटाइजरको व्यवस्था छैन ।’
सांसद जगप्रसाद शर्माले निजामती सेवा ऐन विधेयकमै थन्किदा लोकसेवा आयोगको काम अगाडि बढ्न नसकेको भन्दै विधेयक अगाडि बढाउनुपर्ने माग गर्नुभयो । उहाँले यस विषयमा विलम्ब गर्न नहुने बताउनुभयो ।
राष्ट्रियसभाको विशेष समयमा सांसद रमेशजङ्ग रायमाझीले अन्य दलका कारणले भन्दा पनि दुईतिहाइको सरकार आफ्नै कारणले असफल भएको टिप्पणी गर्नुभयो ।
सांसद रामनारायण विडारीले वर्तमान सरकारलाई विकास निर्माणका साथै किसान र मजदुरको पक्षमा काम गर्न आग्रह गर्नुभयो । उहाँले सर्वोच्च अदालतको परमादेशबारे राजनीतिक दलका नेताहरूले गरेको टिप्पणीले संवैधानिक नैतिकताको खाडल सिर्जना भएको टिप्पणी गर्नुभयो ।
सांसद ठगेन्द्रप्रकाश पुरीले बजारमा वस्तु खरिद गर्दा उपभोक्ता ठगिने गरेको बताउँदै वस्तुको बिक्री–ण्वितरणसम्बन्धी कानुनको प्रभावकारी कार्यान्वयन हुनुपर्नेमा जोड दिनुभयो ।
सांसद डा विमला राई पौडेलले नागरिकतासम्बन्धी विधेयकलाई जतिसक्दो चाँडो अगाडि बढाउनुपर्ने माग गर्नुभयो ।
सांसद चक्रप्रसाद स्नेहीले भ्रष्टाचारको अन्त्य गर्दै देशैभरि भएका हत्या, हिंसा, बलात्कार रोक्नुपर्नेमा जोड दिनुभयो ।
न्यायपरिषद्सम्बन्धी प्रतिवेदन पेस
राष्ट्रियसभाको बैठकमा “न्यायपरिषद् र न्यायसेवा आयोगको वार्षिक प्रतिवेदन–२०७६/७७” पेस भएको छ ।
धानमन्त्री शेरबहादुर देउवाको तर्फबाट गृहमन्त्री बालकृष्ण खाँणले आयोगको वार्षिक प्रतिवेदन सभासमक्ष पेस गर्नुभएको हो ।
बैठकमा सभाका अध्यक्ष गणेशप्रसाद तिमिल्सिनाले राष्ट्रपतिको कार्यालयबाट “संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश–२०७८” खारेजसम्बन्धी प्राप्त पत्रको व्यहोरा पढेर सुनाउनुभएको थियो ।
प्रतिनिधि सभाको अर्को बैठक यही साउन ८ गते दिउँसो १ बजे बस्ने छ ।
