काठमाडौं । फुटको डिलमा पुगेको नेकपा (एमाले) को केपी ओली र माधव नेपाल समूहका नेताहरू छुट्टाछुट्टै बैठक र भेलामा जुटेका छन् । एमाले संस्थापन पक्ष (ओली) समूहको हिजोदेखि बसेको बैठक मंगलबार पनि जारी रह्यो भने वरिष्ठ नेता माधव कुमार नेपाल पक्षका सांसदहरूको पनि भेला भएको छ ।
दुवै पक्ष अब वारपारको तयारीमा देखिएका छन् । ओली पक्षले प्रधानमन्त्री शेरबहादुर देउवालाई विश्वासको मत दिने माधव नेपाललगायत २२ सांसदलाई २४ स्पष्टीकरण सोध्ने निर्णय गरेपनि स्पष्टीकरण सोध्नबाट भने हच्किएको छ । तर, दुवै पक्षका नेताहरूले छिटो फैसला गर्न र वारपार लगाउन नेतृत्वलाई सुझाव दिएका छन् ।
अन्यौलता छिटो हटाऔंः ओली पक्ष
नेकपा(एमाले)का प्रदेश अध्यक्षहरूले पार्टी भित्र देखिएको अन्योलतालाई छिटोभन्दा छिटो समाधान गर्नुपर्ने बताएका छन् । बसेकोे केन्द्रीय कमिटीको बैठकमा आ–आफ्नो प्रदेशको अवस्थाको बारेमा रिर्पोटिङ गर्दै प्रदेश अध्यक्षहरूले एमालेभित्र देखिएको अन्यौलताले पार्टीलाई अगाडि बढाउन समस्या पर्ने भन्दै छिट्टै समाधान गरी लयमा फर्काउनुपर्ने बताएका हुन् ।
मंगलबारको बैठकमा सुदूरपश्चिम प्रदेश अध्यक्ष कर्ण थापा, कर्णाली अध्यक्ष गोरख बोगटी, लुम्बिनी अध्यक्ष लिला गिरी, गण्डकी अध्यक्ष जगत विश्वकर्मा, बागमती अध्यक्ष आनन्द पोखरेल, प्रदेश २ अध्यक्ष ज्वालाकुमारी साह र प्रदेश १ अध्यक्ष देवराज घिमिरेले आ–आफ्नो प्रदेशको संगठनात्मक अवस्था, राजनीतिक शक्ति सन्तुलनको अवस्था र पार्टी गतिविधिको सम्बन्धमा रिर्पोटिङ गर्नुभएको प्रवक्ता प्रदीपकुुमार ज्ञवालीले बताउनुभयो ।
प्रदेश अध्यक्षहरुले पार्टीबाट केही नेताहरु बाहिरिएभने त्यसको प्रभावहरु के पर्न सक्छन् र आसन्न निर्वाचनमा नेकपा(एमाले)को अवस्था कस्तो हुन सक्छ भन्ने सम्बन्धमा पनि रिर्पोटिङ गरेको उहाँले बताउनुभयो । प्रदेश अध्यक्षहरुले प्रशिक्षण कार्यक्रम गरिनुपर्ने र आफुभित्र भएका कमी कमजोरीहरुको पनि आत्मसमिक्षा गर्नुपर्ने सुझाव दिएको प्रवक्ता ज्ञवालीले जानकारी दिनुभयो । २२ एमाले सांसदलाई सोधिएको चौविस घण्टे स्पष्टीकरणको सम्बन्धमा बैठकले कुनै निर्णय नगरेको र सांसदको हातमा पत्र पुगेपछिको २४ घण्टाभित्र स्पष्टिकरण बुझाउनुपर्ने उहाँले बताउनुभयो ।
सांसदको संख्या बढाउने नेपाल पक्षको रणनीति
यता वरिष्ठ नेता (माधव नेपाल पक्ष) का सांसदको बैठकले पछिल्लो राजनीतिक घटनाक्रमबारे छलफल गरेको छ । मंगलवार नयाँ बानेश्वरस्थित अर्याल होटलमा बसेको बैठकले समसामयिक विषयका साथै आफ्नो पार्टीमा कसरी सांसदको संख्या बढाउने भन्ने विषयमा छलफल गरेको नेपाल पक्षका सांसद विरोध खतिवडाले बताउनुभयो । उहाँले आफूलाई जनमानसले पनि र अदालतले पनि साथ दिइरहेको र आफू जहिल्यै सत्यको बाटोमै हिँडेको बताउनुभयो ।
‘हामी संवैधानिक बाटोमा हिँडेकोले हाम्रो संख्या बढ्नेछ’ सांसद खतिवडाले भन्नुभयो, ‘हामी विधिसम्मत बाटोमा हिँडेका छौँ, हामीले उठाएका माग र मुद्दा स्थापित भइरहेका छन्, केपीजीले आफ्नो गलत प्रवृत्तिमा सुधार नल्याएसम्म विवाद रहन्छ ।’
अहिले चलाइएका प्रपोगाण्डा मिडिया खपथको लागि भएको र एमाले केन्द्रीय समिति बैठकले २२ जनालाई २४ घण्टे स्पष्टिकरणको पत्र अहिलेसम्म कसैले पनि नपाएको बताउनुभयो ।
त्यस्तै सांसद रामकुमारी झाँक्रीले आजको बैठकमा प्रतिनिधि सभाको विघटनदेखि पुनस्र्थापनासम्मको भूमिकाबारे छलफल भएको बताउनुभयो । साथै अबको आफ्नो भूमिका के हुन्छ भन्ने बारेमा पनि बैठकमा छलफल भएको बताउनुभयो ।
