काठमाडौं । नेकपा (एमाले) भित्रको विवाद समाधान गर्न गठित कार्यदलमा भएको १० बुँदे सहमतिलाई एमालेकै नेताहरुले अस्वीकार गरेका छन् । प्रतिनिधि सभा विघटनको विषयलाई यथावत राखेर पार्टी एकता हुन नसक्ने नेताहरूले बताएका छन् ।
वरिष्ठ नेता नेपाल पक्षका नेताहरूले १० बुँदे सहमतिले प्रतिगमनका अगाडि घुँडा टेकेको आरोप लगाएका छन् ।
नेपाल निकट नेता डा. विजय पौडेलले सामाजिक सञ्जालमा लेख्नुभएको छ, ‘यदि यसमा सहमति भएको हो भने यो लिखत प्रतिगमनका अगाडि घुँडा टेकेको हो’ पौडेलले सामाजिक सञ्जालमा लेख्नुभएको छ, ‘प्रतिनिधिसभा विघटन गर्नु गलत थियो’ सम्म भन्न नसक्ने यस्तो सहमतिले पार्टी एकता हुन्न।’
यदि यसमा सहमति भएको हो भने यो लिखत प्रतिगमनका अगाडि घुडा टेकेको हो । `प्रतिनिधिसभा बिघटन गर्नु गलत थियो ´ सम्म भन्न नसक्ने यस्तो सहमतिले पार्टी एकता हुन्न । pic.twitter.com/WfqSd2EB2f
— Dr. Vijay Poudel (@drvijaypou) July 11, 2021
यस्तै, माधव नेपाल पक्षका अर्का नेता रामकुमारी झाक्रीले सहमतिलाई स्वागत गर्न हतार गर्न आवश्यक नभएको भन्दै अदालतको निर्णयलाई प्रभावित पार्नेगरी हस्ताक्षर फिर्ता लिन नसकिने बताउनुभएको छ । झाक्रीले आफ्नो समूहको केन्द्रीय कमिटीको बैठक बसेर संस्थागत धारणा आउने बताउनुभयो ।
‘स्थायी कमिटीको बैठकमा जानेबारे सामान्य बैठकको कार्यविधि निर्धारण नगरी यो संझौता कार्यान्वयन योग्य हुदैन। बैठक जाने कुरा हुन्न’ उहाँले लेख्नुभएको छ, ‘अदालतमा निवेदकको रूपमा रहेका हामी सांसदहरूले अदालतको निर्णय प्रभावित हुने गरि हस्ताक्षर फिर्ता लिईने छैन। लिने कुरै आउँदैन।’
सो सहमतिबाट ओलीका विश्वासपात्रहरू भने प्रशन्न देखिएका छन् । सो सहमतिलगत्तै प्रधानमन्त्रीका प्रेस सल्लाहकार सूर्य थापाले शेरबहादुर देउवाको पक्षमा गरिएको नेपाल पक्षका २३ सांसदको हस्ताक्षर फिर्ता हुने दाबी गर्नुभएको छ ।
‘शेर बहादुर देउवाको साथमा निवर्तमान सांसदहरु अब १४६ माइनस २३ बराबर १२३ मात्र । सर्वोच्चद्वारा न परमादेश न पुनर्स्थापना’ थापाले लेख्नुभएको छ, ‘मच्चियो मच्चियो जेठो नराम्ररी थच्चियो, जय नेपाल ।’
वरिष्ठ नेता नेपालले भने अदालतलाई प्रभावित पार्ने सहमति मान्य नहुने बताउनुभएको छ । आफूनिकट नेताहरुसँग नेपालले अदालतलाई प्रभावित पार्ने र अध्यक्ष केपी ओलीलाई नै पुनः शक्तिशाली बनाउन खोजिएको भन्दै असन्तुष्टि जनाएको उहाँ निकट एक नेताले बताए ।
उहाँले सामाजिक सञ्जालमार्फत ‘अदालतमा विचाराधिन मुद्दालाई प्रभावित पार्ने वा अदालतको मानहानी गर्ने गरी गरिएको वा गरिने व्याख्या मान्य नहुने कुरा स्पष्ट पार्दै सर्वोच्च अदालतमा विचाराधिन मुद्दामा निवेदक रहेका नेकपा (एमाले)का २३ जना सांसदहरू सबै एकसाथ रहेको र आफ्नो मान्यता र हस्ताक्षर मा दृढ रहेको’ बताउनुभएको छ ।
पूर्वमन्त्री गोकुल बाँस्कोटाले सूर्य थापाप्रति समर्थन गर्दै माधव नेपाललाई तीखो व्यंग्य गर्नुभएको छ । ‘एमालेले एमाले हौं भन्दा कसरी अदालत प्रभावित पार्न खोजेको हुन्छ ? अचम्म ! कांग्रेसले आफूलाई एमाले भन्ला त ?’ बास्कोटाले ट्वीट गर्दै भन्नुभएको छ ।
यो पनि : एमाले कार्यदलमा सहमति, यस्ता छन् सहमतिका १० बुँदा
