बर्लिन । जर्मनीले कोभिड–१९ का कारण बेलायती, पोर्चुगाली, रुसी भारतीय र नेपाली पर्यटकलाई लगाएको यात्रा प्रतिबन्ध बुधबारदेखि हट्ने भएको छ ।
दुबै खोप लगाइसकेका र कोभिड–१९ सङ्क्रमण नरहेका पर्यटकहरूले जर्मनी पुगेपछि क्वारन्टिनमा समेत बस्नुनपर्ने बर्लिनले जनाएको छ ।
यद्यपि खोप नलगाएका व्यक्तिको सम्बन्धमा भने १० दिनसम्म क्वारन्टिनमा बस्नुपर्ने छ । खोप नलगाएका व्यक्तिले पनि क्वारिन्टिनमा बसेको पाँचौँ दिनमा परीक्षण गर्दा कोभिड–१९ सङ्क्रमण नपाइएमा उनीहरूलाई स्वतन्त्र हिँडडुल गर्न दिइने पनि जर्मनीको प्रशासनले बताएको छ ।
बेलायत, पोर्चुगल, रुस, भारत र नेपाललाई हालसम्म कोभिडको डेल्टा र डेल्टा प्लस भाइरसको प्रकार फैलिएका कारण कोभिडको महामारीजन्य जोखिमयुक्त मुलुकका रूपमा वर्गीकरण गरिएको थियो । सुरुमा भारतमा पहिचान भएको कोभिडको डेल्टा प्रजातिलाई विश्व स्वास्थ्य सङ्गठनले अति जोखिमयुक्त प्रजातिका रूपमा वर्गीकरण गरेको छ ।
महामारी नियन्त्रणका लागि ती मुलुकका नागरिकका लागि यात्रा प्रतिबन्ध लगाइएको भए पनि जर्मनीका नागरिक वा स्थायी बासिन्दामाथि प्रतिबन्ध लागु गरिएको थिएन तर उनीहरू जर्मनी प्रवेश गर्दा १४ दिन क्वारन्टिनमा बस्नुपर्ने व्यवस्था भने गरिएको थियो ।
यी पाँच राष्ट्रलाई अब सङ्क्रमितको सङ्ख्या अझै उच्च रहेको देशका रूपमा वर्गीकृत गरिने त्यहाँको स्वास्थ्य निकायले जनाएको छ । (रासस/एएफपी)
