काठमाडौं । नेकपा एमालेको विवाद समाधान गर्न गठित कार्यदल पुनः सक्रिय भएको छ । माधव खनाल पक्षले शेरबहादुर देउबालाई प्रधानमन्त्री बनाउन हस्ताक्षर गरे पछि अवरुद्ध भएको कार्यदलको बैठक आज साँझ सिंहदरबारमा बसेको छ ।
आइतबार बेलुका माधव खनाल पक्षका नेता भीम रावलले प्रधानमन्त्रिलाई भेटेको समाचार आए सँगै कार्यदलको बैठक बसेको छ । अनौपचारिक छलफलमा निरन्तर रहेका दोश्रो तहका नेताहरु बीचको वार्ता सकारात्मक बनेको बताइएको छ । आज साँझ भएको वार्ता पछि बोल्दै नेताहरुले छलफल सकारात्मक भएको र सहमति नजिक पुगेको विषय नेताहरु बीच साझा गरेको बताएका छन् । नेताहरुले बैठक निरन्तर बस्ने सहमति साथ भएको बताएका छन् ।
नेकपा एमाले भित्रको आन्तरिक राजनीति बिग्रदै जाँदन पार्टी बिभाजन हुने आशंका बीच भएको वार्तालाई विश्लेषकहरुले सकारात्मक संकेत भनि टिप्पणी गरेका छन् । अघिल्लो महिना अध्यक्ष केपी शर्मा ओली र वरिष्ठ नेता माधवकुमार नेपालबीच भएको भेटमा भएको सहमति अनुसार गठित कार्यदलले विभिन्न चरणमा छलफल गरे पनि निष्कर्षमा पुग्न सकेको छैन ।
यसरी गठन भएको कार्यदलमा ओली पक्षका संयोजक सुवास नेम्वाङसँगै विष्णु पौडेल, शंकर पोखरेल, प्रदीप ज्ञवाली र विष्णु रिमाल छन् भने माधव नेपाल पक्षका संयोजक भीम रावलसँगै सुरेन्द्र पाण्डे, रघुजी पन्त, घनश्याम भुषाल र गोकर्ण विष्ट छन् । सर्वोच्चमा रीट परेसँगै निष्क्रिय भएको बार्ता सर्वोच्चमा बहस सकिएको दिन नै बसेको छ । नेपाल कम्युनिष्ट पार्टी हुँदा अन्तरकलह बढिरहेको बेला सर्वोच्चको एक फैसलाले नेकपा एमाले र नेकपा माओबादीको रुपमा अलग अलग पूर्ववत रुपमा फर्काएसँगै विवाद झन् बढेको हो ।
अध्यक्ष ओलीले कांग्रेस सभापति देउवाको पक्षमा गरेको हस्ताक्षर फिर्ता लिन माधव नेपाल पक्षलाई दिएको अल्टिमेट सोमबार अपरान्ह ५ बजे सकिएको छ । अल्टिमेटम सकिएसँगै फुटको नजिक पुगेको भनिएको एमालेलाई मिलाउन फेरि दोस्रो तहका नेताहरु सक्रिय भएका हुन् ।
