दाङ । दाङका पाँच विद्यार्थी सङ्गठनले निषेधाज्ञा अवधिभर प्रश्नोत्तर समेटिएको अभ्यास पुस्तिका तयार पारी वितरण गर्न माग गरेका छन् ।
भर्चुअल कक्षामा प्राविधिक, भौगोलिक र अन्य समस्याका कारण उपस्थित हुन नसक्ने विद्यार्थीलाई लक्षित गरी उनीहरूले यस्तो अवधारणा अगाडि सारेका हुन् ।
बिहिबार बसेको बैठकले शिक्षक र विद्यार्थीलाई उच्च प्राथमिकतामा राखी खोपको व्यवस्था गर्नुका साथै वैकल्पिक माध्यमबाट समेत अध्यापनको व्यवस्था मिलाउन आग्रह गरिएको छ ।
त्यसैगरी उनीहरूले एसइईको नतिजा नआउँदै कक्षा ११ को भर्ना खोलेकोमा विरोध गरेका छन् भने पढाइ नभए पनि शुल्क असुल्ने शैक्षिक संस्थासित सो शुल्क छुट गराउन माग गरेका छन् ।
विज्ञप्तिमा उनीहरूले जिल्लाका शैक्षिक संस्थाहरूको तत्कालै अनुगमन, निरीक्षण र आवश्यक कारबाही गर्न स्थानीय निकायसित आग्रह गरेका छन् ।
एवम् प्रकारले वक्तव्यमा लकडाउनको अवधिमा विद्यार्थीका लागि कोठाभाडा छुट दिनुपर्ने, घोराही–तुलसीपुर खण्डमा यातायात सहज बनाउन तत्कालै डाइभर्सनको व्यवस्था गर्नुपर्ने र बढ्दो महङ्गी र कालोबजारी नियन्त्रण गर्न माग गरेका छन् ।
संयुक्त प्रेसविज्ञप्तिमा अखिल (छैठौं) का सचिव लक्ष्मण विक, नेपाल विद्यार्थी सङ्घका नेता कुलराज पोख्रेल, अखिल (क्रान्तिकारी) का जिल्ला कार्यालय सदस्य गिरबहादुर महरा, अनेरास्ववियुका संयोजक रविन्द्र डाँगी र समाजवादी विद्यार्थी युनियनका जिल्लाध्यक्ष दीपक पोख्रेलको हस्ताक्षर रहेको छ ।
