जेनेभा । विश्वका झन्डै एकचौथाइ जनसङ्ख्यालाई अझै पनि सफा पानीको अभाव रहेको पाइएको छ ।
गत वर्ष सन् २०२० मा गरेको अध्ययनले विश्वासका हरेक चारमध्ये एक जनालाई शुद्ध र सफा खानेपानीको अभाव रहेको देखाएको हो ।
विश्व स्वास्थ्य सङ्गठन र संयुक्त राष्ट्रसङ्घीय बालकोष (युनिसेफ) ले बिहिबार सार्वजनिक गरेको विवरणमा खानेपानीको अभावको अवस्था नराम्रो देखिएको उल्लेख छ ।
सफा पानीको उपभोग गर्न नपाएकालाई विभिन्न प्रकारका रोगको समस्या हुन सक्ने भएकाले त्यसलाई न्यूनीकरण गर्नुपर्नेमा दुवै निकायका अधिकारीले जोड दिएका छन् । उनीहरूले कोरोना महामारीको असर पनि सफा पानी खान नपाउनेलाई बढी पर्ने चन्दै चिन्ता व्यक्त गरेका छन् ।
कोरोनाबाट बच्नका लागि सफा पानी र साबुनले हात धुन अनिवार्य रहेकाले पनि सफा पानीको अभावमा कोरोनाबाट बच्न गाह्रो हुने अधिकारीले उल्लेख गरेका छन् ।
एक तथ्याङ्कअनुसार विश्वका हरेक १० मध्ये ३ जनाले साबुनपानीले पर्याप्त हात धुन नपाएको देखिएको छ ।
‘कोरोनाबाट जोगिनका लागि हात धुने कार्य अति महत्त्वपूर्ण कार्य हो, यो नै अति धेरै प्रभावकारी उपाय हो, त्यसैगरी अन्य धेरै रोगबाट जोगिन पनि सफा पानीले हात धुनुपर्दछ, त्यसैले आम मानिसलाई रोगबाट बचाउन सफा पानीको आवश्यकता पर्दछ’ विश्व स्वास्थ्य सङ्गठनका महानिर्देशक टेड्रोस अदानोम घेब्रेयसले भन्नुभयो ।
त्यसैगरी युनिसेफका कार्यकारी निर्देशक हेनरैत्ता फोरले पनि विश्वका लाखौँ बालबालिका सफा पानी उपभोग गर्न बन्चीत हुनु दुःखद कुरा भएको बताउनुभयो । तर पहिलाको भन्दा अहिले सफा पानीको प्रयोग गर्न पाउनेको सङ्ख्यामा भने वृद्धि भएको उहाँले जानकारी दिनुभयो ।
२०१६ देखि २०२० सम्ममा सफा पानीको प्रयोग गर्न पाउनेको सङ्ख्यामा चार प्रतिशतले वृद्धि भएको उल्लेख गर्नुभयो । उहाँका अनुसार २०१६ मा विश्वका ७० प्रतिशतले मात्रै सफा पानी प्रयोग गर्न पाएको तथ्याङ्क सार्वजनिक भएको थियो । (रासस–सिन्ह्वा)
