अदिस अबाबा । इथियोपियाको विद्रोही सङ्गठन टिग्रे पिपुल्स लिबरेसन फ्रन्टले केन्द्रीय फौज विरुद्धको नयाँ आक्रमण सुरु गरेको एक सातापछि टिग्रेस्थित विद्रोही लडाकुले आफूहरूले क्षेत्रीय राजधानी मिकेली कब्जा गरेको दावी गरेका छन् ।
यद्यपि इथियोपिया सरकारले भने आफूले कब्जा गुमाएको पुष्टि गरेको छैन, बरु युद्धविरामको एकतर्फी प्रस्ताव गरेको छ ।
मिकेलीलाई इथियोपियाको सरकारी फौजले गत नोभेम्बरमा विद्रोहीको कब्जाबाट फिर्ता लिएको थियो । मिकेलीस्थित प्रत्यक्षदर्शीले उत्सव मनाउन सडकमा मानिसहरू नाचिरहेको बताएका छन् ।
टिग्रेमा गत साता नयाँ आक्रामक हमलाहरू सुरु गरेका त्यहाँका लडाकुले मिकेलीको अन्तरिम प्रशासनलाई बाहिर निकालेको भन्ने खबर सोमवारदेखि आउन थालेका हुन् ।
टिग्रेक्षेत्रमा त्यहाँको नेतृत्वलाई बाहिर निकाल्नका लागि प्रधानमन्त्री अबी अहमदले आठ महिनाअघि सरकारी फौज पठाउनुभएको थियो ।
टिग्रे पिपुल्स लिबरेसन फ्रन्टका प्रवक्ताले मिकेली आफ्नो नियन्त्रणमा आएको एएफपीसँगको कुराकानीमा दावी गर्नुभयो । अन्तरिम सरकारका एक अधिकारीले नाम उल्लेख नगर्ने सर्तमा एएफपीसँग मिकेलीबाट सरकारी सेना पछि हटेको पुष्टि गरेका छन् ।
यसैबिच, संयुक्त राष्ट्र सङ्घका महासचिव एन्टेनियो गुटेर्रेसले प्रधानमन्त्री अबीसँग सोमबार कुरा गर्दै सर्वसाधारणको सुरक्षा र मानवीय सहायता मानिससम्म पुगेको सुनिश्चित गर्न आवश्यक रहेको बताउनुभएको छ । उहाँले राजनीतिक समाधान खोज्न पनि प्रधानमन्त्री अबीलाई आग्रह गर्नुभयो ।
संयुक्त राष्ट्र सङ्घले ५० लाखभन्दा बढी मानिस खाद्यान्न सहायताको पर्खाइमा रहेको र ३ लाख ५० हजार मानिसले भोकमरीको सामना गरिरहेको जनाएको छ । इथियोपियामा द्वन्द्वरत सबै पक्षमाथि आमहत्या र मानवअधिकार उल्लङ्घनको आरोप लागेको छ ।
इथियोपियामा सरकारी फौजबाट मिकेलीलगायतका ग्रामीण क्षेत्रलाई विद्रोहीको कब्जाबाट फिर्ता लिने क्रममा महिला तथा किशोरीमाथि बलात्कार तथा दुव्र्यवहारका घटना भइरहँदा त्यहाँका नागरिकले टिग्रे पिपुल्स लिबरेसन फ्रन्टलाई सहयोग गरेका कतिपय स्थानीयले बताएका छन् ।
सेनाले किशोरीमाथि बलात्कार र मानवीय दुव्र्यवहार गर्ने गरेको र प्रतिकार गर्न खोज्नेको हातखुट्टा नै काटिदिनेजस्ता अमानवीय व्यवहार गर्ने गरेको अन्तर्राष्ट्रिय सञ्चार माध्यमले बताएका छन् । (रासस/एएफपी)
