बगदाद । इराकको राजधानी बागदादमा मध्यपूर्वी देश इराक, इजिप्ट र जोर्डनका नेताहरूको आइतबार त्रिपक्षीय भेटवार्ता भएको बताइएको छ ।
सो वार्तामा इराकका प्रधानमन्त्री मुस्ताफा अल कादिमी, इजिप्टका राष्ट्रपति अब्देल फताह अल सिसी र जोर्डनका राजा अब्दुल्लाह द्वितीयको उपस्थिति रहेको बताइएको छ ।
सो वार्ताको अग्रसरता इराकका प्रधानमन्त्री मुस्ताफाले लिनुभएको पनि विभिन्न अन्तार्राष्ट्रिय सञ्चार माध्यमले जनाएका छन् । त्यस भेट तथा वार्ताका क्रममा उहाँहरूले आपसी आर्थिक साझेदारी र विकासलाई अझ सुदृढ बनाउने र सुरक्षाको विषय तथा क्षेत्रीय स्थायित्वका बारेमा पनि कुराकानी भएको समाचारमा जनाइएको छ ।
भेटवार्तापछि आइतबार इराकी प्रधानमन्त्री मुस्ताफाको कार्यालयले जारी गरेको विज्ञप्तिमा भनिएको छ– हामीहरूले गरेको भेटघाटले खासमा हामी एक छौँ र हामीले आवश्यकतानुसार एकापसमा सहयोगको आदान प्रदान गर्न सक्छौँ भन्ने हो । साथै सो विज्ञप्तिमा यी तीन देशका नेताहरूको उक्त भेटघाटले आफ्ना देशका जनतालाई आवश्यक परेको सहयोग गर्ने र त्यसका लागि हामीहरू तयार छौँ भनेर पनि सन्देश दिन खोजेको उक्त प्रेस वक्तव्यमा जनाइएको छ ।
त्यस विज्ञप्तिमा हालैका दिनमा यी तीन वटा देशले सामना गरिरहेका चुनौतीको समाधानका लागि सामूहिक रूपमा पहल गरिने जानकारी पनि दिइएको छ । खासमा यी देशले हाल कोभिड–१९ को समस्या झेल्नुपरिरहेको बताइएको छ ।
कोभिड–१९ को समस्याका कारण ती देशको आर्थिक अवस्था निकै कठिन भएको र उनीहरूले आतङ्कवादका कारण सुरक्षाका क्षेत्रमा पनि चुनौती भोग्नुपरेको भन्दै सो विज्ञप्तिमा भनिएको छ– त्यसैले यी नेताहरूले जारी ती सबै खालका समस्याको समाधानका लागि एकताबद्ध भएर लाग्ने प्रतिबद्धता व्यक्त गरेका छन् । (रासस/सिन्ह्वा)
