जेरुसेलम । इजरायली वायुसेनाले बुधबार बिहानै प्यालेस्टिनीको बसोबास रहेको गाजापट्टीमा धेरैवटा हवाइ आक्रमण गरेको छ । गत महिना गाजापट्टीमा सक्रिय हमास समूहसँग युद्धविराम गरेपछि पहिलो पटक इजरायली सेनाले आक्रमण गरेको हो ।
इजरायली सेनाले हमास लडाकु समूहका ठेगानालाई लक्षित गरिएको जनाएको छ । हमास लडाकुले इजरायली भूमिमा आक्रमण गर्ने योजना बनाइरहेको सूचनाका आधारमा हवाइ हमला गरिएको पनि सेनाको भनाइ छ ।
इजरायली आक्रमणबाट कुनै जनधनको क्षतिका बारेमा विवरण प्राप्त भइसकेको छैन ।
मङ्गलबार सयौँ इजरायली अतिराष्ट्रवादीले पूर्वी जेरुसेलममा अरब र प्यालेस्टिनी विरुद्ध चर्का नाराबाजीसहित प्रदर्शन गरेका थिए । यस प्रदर्शनले पुनः हिंसात्मक शृङ्खला सुरु हुने खतरा निम्त्याएको छ ।
प्रतिक्रियास्वरूप गाजास्थित प्यालेस्टिनीले इजरायलको दक्षिणी भेगमा विष्फोटक पदार्थ भरिएका बेलुनहरू गाजाबाट उडाएका थिए । यी बेलुन बिस्फोटबाट करिब दश ठाउँमा आगो लागेको इजरायली सेनाको भनाइ छ ।
यहुदी समुदायको जुलुस प्रदर्शनले झिनो बहुमतसहित बनेको सरकारका साथै ११ दिनसम्म चलेको इजरायल र हमासबिचको युद्ध रोक्ने गरी भएको युद्धविराम सम्झौतालाई सङ्कटमा पार्ने खतरा उत्पन्न गरेको छ ।
गत महिनाको आक्रमणमा २५० जना प्यालेस्टिनी र १३ जना इजरायलीको ज्यान गएको थियो भने गाजामा बम आक्रमणबाट ठुलो सङ्ख्यामा धनमाल क्षतिग्रस्त भएको थियो ।
यहुदी समुदायले गरेको प्रदर्शनलाई प्यालेस्टिनीहरूले अत्यन्त निन्दनीय र खेदपूर्ण भनेका छन् । हमासले उक्त प्रदर्शनको प्रतिरोध गर्न प्यालेस्टिनी समुदायसँग अपिल गरेको छ । पूर्वी जेरुसेलमकै विवादलाई लिएर गत महिना ११ दिने युद्ध भएको थियो ।
गाजा–बाजा सहितका सयौँ अतिराष्ट्रवादी यहुदीको समूहले दमास्कस गेटसम्म प्रदर्शन गरेका थिए । यी प्रदर्शनमा सहभागीहरू अधिकांश युवा थिए र धेरैले इजरायली झण्डा बोकेका थिए । तर इजरायली विदेशमन्त्री याइर लापिडले ट्विट गर्दै उक्त प्रदर्शनको निन्दा एवम् भत्र्सना गर्नुभएको छ । उहाँले जातिभेदी नाराबाजीले इजरायली जनताको अपमान गर्ने बताउनुभएको छ ।
यो प्रदर्शनमा सहभागीहरू अघिल्लो महिनाका भन्दा कम थिए । दमास्कस गेटबाट उक्त भिड पुरानो सहरबाट पश्चिमी पर्खालतर्फ गएको थियो, जहाँ यहुदीहरूले प्रार्थना गर्ने गर्दछन् । (रासस–एपी)
