बेइजिङ । चीनले सोमबार नेटोद्वारा जारी विज्ञप्तिमा बेइजिङले “प्रणालीगत चुनौती” प्रस्तुत गर्दै आएको भन्ने दावीलाई खण्डन गरेको छ ।

नेटोको भनाइप्रति असहमति जनाउँदै चीनले नेटामा “शीतयुद्धकालीन मानसिकता र समूह राजनीतिको निरन्तरता” रहेको भन्दै असन्तुष्टि व्यक्त गरेको छ ।

युरोपेली युनियन (इयु) का लागि चिनियाँ नियोगका प्रवक्ताले एक विज्ञप्तिमार्फत् भन्नुभयो– “चीन प्रतिरक्षा नीतिप्रति प्रतिबद्ध छ जुन ‘प्राकृतिक प्रतिरक्षा हो’ र चीनको रक्षा र सैनिक आधुनिकीकरणको कार्य ‘न्यायसङ्गत, उचित, खुला र पारदर्शी’ रहेको छ ।”

२०१९ पछि उत्तर एटलान्टिक सन्धि सङ्गठन (नेटो) को पहिलो बैठकमा चीन छलफलको केन्द्रबिन्दु थियो । सोमबार जारी विज्ञप्तिमा नेटो नेताहरूले चीनको अडानबारे चासो व्यक्त गर्दै बेइजिङको जबरजस्त नीतिप्रति चिन्ता व्यक्त गरेका साउथ चाइना मर्निङ पोस्टमा उल्लेख छ ।

युरोपेली र उत्तर अमेरिकी ३० देशको नेटो गठबन्धनले चीनले “प्रणालीगत चुनौती” पेस गरेको र बेइजिङले सिर्जना गरेको प्रभावको प्रतिरोध गर्ने प्रतिबद्धता जनाएका छन् ।

शिखर सम्मेलनको समापनपछि पत्रकार सम्मेलनमा नेटोका महासचिव जेन्स स्टोल्टनबर्गले भन्नुभयो– “चीनले धेरै हतियार र अत्याधुनिक परिष्कृत, प्रक्षेपण प्रणालीको साथ आफ्नो परमाणु शस्त्रागार द्रुत गतिमा विस्तार गरिरहेको छ, साथै रुससँगको सैन्य सहकार्य बढाएको छ भन्ने पुष्टि भएको छ ।”

“नेटो नेताहरूले चीनसँग उसको अन्तर्राष्ट्रिय प्रतिबद्धतालाई समर्थन गर्न, अन्तरिक्ष प्रणाली, साइबर र सामुद्रिक क्षेत्रलगायतका अन्तर्राष्ट्रिय प्रणालीमा जिम्मेवार भई कार्य गर्नका लागि प्रमुख शक्तिको रूपमा आफ्नो भूमिका निर्वाह गर्न आह्वान गरेका छन्” स्टोल्टनबर्गले भन्नुभयो ।
साउथ चाइना मर्निङ पोस्टका अनुसार ७९ बुँदे कथनमा तीन अनुच्छेद र १० लाई चीनप्रति समर्पित गरिएको छ ।

नेटोका महासचिव स्टोल्टनबर्गको टिप्पणीप्रति प्रतिक्रिया व्यक्त गर्दै चीनले कुनै पनि बेला र कुनै पनि परिस्थितिमा आणविक हतियारको प्रयोग नगरेको पहिलो सिद्धान्तको पालना गर्दछ र गैरआणविक हतियार नभएका राष्ट्रलाई आणविक हतियारमुक्त क्षेत्र घोषणा गर्दै उनीहरू विरुद्ध आणविक हतियारको प्रयोग गर्ने वा धम्की नदिने बताएको छ ।

म यो प्रश्न सोध्न चाहन्छु कि शान्ति, सुरक्षा र स्थायित्वका लागि प्रयास गरिरहेका नेटो र त्यसका सदस्य राष्ट्रले पनि के चीन जत्तिकै प्रतिबद्धता व्यक्त गर्न सक्छन् भनी नियोगका प्रवक्ताले प्रतिप्रश्न गर्नुभएको छ ।