महेश रिजाल, दाङ ।।
दाङको इलाका प्रहरी कार्यालय भालुबाङमा कार्यरत प्रहरी निरीक्षक भूवनदेव भट्टले एक मजदुरमाथि साङ्घातिक कुटपिट गरेका छन् ।
घटना विवरणअनुसार आइतबार बिहान भालुभाङस्थित माउन्टेन मिनिरल वाटर एन्ड विभरेजमा कार्यरत १८ वर्षीय मजदुर चन्द्र थापा उपभोक्ताको मागअनुसार पुलचोकका स्थानीयहरूको घरमा मिनरल वाटर जार पुर्याइरहेको अवस्थामा मास्क किन नलगाएको ? भन्दै प्रहरी निरीक्षक भट्टले मजदुरलाई एक्कासी लाठी प्रहार गरेका थिए ।
इन्सपेक्टर भट्टको कुटाइबाट ती मजदुरको दाहिने खुट्टाको तिघ्रामा डाम बसेको छ । प्रहरीको कुटाइबाट ज्वरो आउने र खुट्टामा साह्रै दुखाइ भइरहेको पीडित मजदुरले बताए ।
यस सम्बन्धमा प्रहरी निरीक्षक भट्टसँग वास्तविक बुझ्दा स्वास्थ्य मापदण्ड लागु गर्ने क्रममा आफूबाट केही कमजोरी भएको भएता पनि मजदुर कुट्ने मनसाय नरहेको प्रतिक्रिया दिएका छन् ।
उक्त मिनरल वाटर उत्पादन कम्पनीमा प्रोपाइटर मानसिंह पुनसँग बुझ्न खोज्दा अहिले उद्योगी, व्यवसायी, मजदुरलगायत सर्वसाधारण कसैको पनि सुरक्षा नभएको भनी चिन्ता व्यक्त गरेका छन् ।
