काठमाडौं । धनुषाको बटेश्वर गाउँपालिकाका अध्यक्ष डम्बरबहादुर राउतलाई गाउँपालिकामा भब्य स्वागत गरिएको छ । घुस काण्डमा मुछिएपछि तीन महिना ‘भूमिगत’ भएका अध्यक्ष आइतबार मात्रै कार्यालय आएका हुन् ।
अध्यक्ष राउतलाई उनी सम्बद्ध दल नेकपा (एमाले) का नेता कार्यकर्ता र गाउँपालिकाका कर्मचारीले फूल माला लगाएर स्वागत गरेका छन् ।
गएको फागुन १७ गते ८ लाख रुपैयाँ घुस रकम लिएर गाउँपालिकाकै गाडीमा घर जान लागेका अध्यक्ष राउतलाई अख्तियार दुरुपयोग अनुसन्धान आयोग केन्द्रीय कार्यालय टंगालको टोलिले पछ्याएको थियो । अख्तियारले पछ्याएको थाहा पाएपछि उनी घुस रकम सुक्जोर खोलाको किनार फालेर फरार भएका थिए ।
गाउँपालिकाको गाडीसहित चालक वीरबहादुर मगरलाई अख्तियारले नियन्त्रणमा लिएको थियो भने उनले फालेर भागेको ८ लाख रुपैयाँ घुस रकमसेमत बरामद गरेको थियो।
घुस लिएको रकमसमेत अख्तियारले फेला पारेपछि तीन महिनासम्म फरार भएका अध्यक्ष राउतले ‘माथि’ कुरा मिलाएर कानुनी कारबाहीबाट बँच्न सफल भएपछि कार्यालयमा फर्किएका थिए । गाउँपालिका अध्यक्षले कार्यालयको भवन निर्माण योजनाको भुक्तानीको लागि ठेकेदारबाट ८ लाख रुपैयाँ घुस लिएका थिए ।
अध्यक्ष राउतलाई राज्य संयन्त्रले कानुनी कारबाही नगरेपछि स्थानीयले विरोध प्रदर्शन गरेका छन् । उनको भित्र स्वागत भइरहँदा कार्यालय बाहिर उनलाई बहिष्कार र कानुनी कारबाहीको माग गर्दै युवाहरुले प्रदर्शन गरेका हुन् ।
