बेइजिङ । चीनले अन्तरिक्षमा निर्माण गरेको आÇनै नयाँ अन्तरिक्ष केन्द्रमा अन्तरिक्ष यात्री पठाउन रकेट तयार भएको जनाएको छ । यो रकेट अर्को साता अन्तरिक्षतर्फ पठाइने तयारी चीनले गरेको छ ।
चीनले पहिलो पटक तीन जना अन्तरिक्ष यात्रीलाई नयाँ अन्तरिक्ष केन्द्रमा पठाउँदै छ । उनीहरू तीन महिना अन्तरिक्षमा रहने छन् ।
उनीहरूले त्यहाँ रहँदा अन्तरिक्ष केन्द्रबाहिर हिँड्ने (स्पेसवाक), निर्माण र मर्मतका साथै वैज्ञानिक अनुसन्धान गर्नेछन् ।
तियान्हे नाम दिइएको नयाँ अन्तरिक्ष केन्द्रको मुख्य खण्ड गत अप्रिल २९ मा अन्तरिक्षमा पठाइएको थियो भने गत महिना अन्तरिक्ष यात्रीका लागि आवश्यक इन्धन, खाद्यान्न र उपकरण बोकेको कार्गो रकेट पठाइएको थियो ।
लङ मार्च–२एफ वाई१२ रकेटलाई २०७८ जेठ २५ गते बुधबा चीनको उत्तर–पश्चिमस्थित जिक्वान स्याटेलाइट लन्च सेन्टरमा पठाइएको छ । यो रकेटले सम्भवतः आगामी बुधबार अन्तरिक्ष यात्रीलाई अन्तरिक्षमा पठाउने छ ।
चिनियाँ अन्तरिक्ष इन्जिनियरिङ कार्यालयले अर्को वर्षको अन्त्यसम्ममा ११ वटा रकेट प्रक्षेपण गर्ने छ, जसले दुई वटा प्रयोगशाला मोड्युल अन्तरिक्षमा पठाउने छ । हाल तियान्हेको वजन करिब ७० टन छ । चीनले चार पटक अन्तरिक्ष यात्री अन्तरिक्षमा पठाउने योजना बनाएको छ ।
चीनले पठाउन लागेका अन्तरिक्ष यात्रीमा वरिष्ठ अन्तरिक्ष यात्री, नयाँ व्यक्ति र महिला पनि रहेका छन् । चीनले यसअघि ११ जना यात्रीलाई अन्तरिक्षमा पठाइसकेको छ, जसमा सबैजसो चीनको सेनाका पाइलट रहेका छन् ।
हालसम्म संयुक्त राज्य अमेरिका र रुसले अन्तरिक्षमा अन्तर्राष्ट्रिय अन्तरिक्ष केन्द्र बनाएका छन् । यी केन्द्रमा अमेरिका र रुससमेत अन्य देशका अन्तरिक्ष यात्रीलाई अवसर दिइए पनि चीनलाई भने सुरक्षा खतरा भन्दै संयुक्त राज्य अमेरिकाले सहभागी गराइरहेको छैन । (रासस–एपी)
