दाङ । राष्ट्रिय जनमोर्चाका अध्यक्ष चित्रबहादुर केसीले ओली सरकारको असंवैधानिक, अलोकतान्त्रिक, अधिनायकवादी र राष्ट्रघाती कदमका विरुद्ध संयुक्त आन्दोलन उठाउनुपर्ने कुरामा जोड दिनुभएको छ ।
राजमो दाङ–देउखुरीको आयोजनामा “ओली सरकारको असंवैधानिक, अलोकतान्त्रिक, अधिनायकवादी तथा राष्ट्रघाती कदम र संयुक्त आन्दोलनको आवश्यकता” विषयक भर्चुअल अन्तरक्रिया कार्यक्रमलाई सम्बोधन गर्दै अध्यक्ष केसीले उक्त कुरामा जोड दिनुभएको हो ।
‘नेपाली जनताले लामो आन्दोलनबाट प्राप्त गरेका उपलब्धिहरू ओलीले खोस्ने काम गरिरहेका छ्न । उनी सत्ता र स्वार्थका लागि जस्तोसुकै जनघाती र राष्ट्रघाती कदम चाल्न पनि पछाडि पर्दैनन भन्ने कुरा अब प्रस्ट भइसकेको छ’ अध्यक्ष केसीले भन्नुभयो– ‘जनतालाई सङ्गठित गर्दै संयुक्त आन्दोलनबाट उनलाई हटाउनुपर्छ र उपलब्धिको रक्षा गर्नुपर्छ ।’
सम्बोधनको क्रममा उहाँले इतिहासको सम्झना गर्दै नेपालमा राणा, राजा, पन्च सबै संयुक्त आन्दोलन र जनताको तागतले हटेकाले ओलीको अधिनायकवाद पनि हट्ने विश्वास व्यक्त गर्नुभयो ।
‘सरकारमा अहिले साम्प्रदायिकतावादीको प्रवेश भएको छ । जसको नेपाली नागरिकता नै छैन, उनै अब सरकार सञ्चालक बन्दै छन्’ उहाँले भन्नुभयो– ‘यसैले पनि बुझाउँछ, देशको अवस्था कस्तो छ भन्ने कुरा ।’
अध्यक्ष केसीले भन्नुभयो– ‘बिरामी जनता अक्सिजन पाइराखेका छैनन । नागरिक सडकमा आउने अवस्था छैन । तर ओली यही मौका पक्रेर राष्ट्रघात गरिरहेका छन् ।’
उहाँले नेपालको विशिष्ट अवस्थालाई हेरेर बारम्बार नागरिकताको प्रावधान खुकुलो बनाउन हुँदैन भन्ने मत राखेको बताउनुभयो ।
‘तर त्यो कुरामा अरू कसैले ध्यान गएन’ उहाँले भन्नुभयो– ‘अब अहिले नेपाललाई सिक्किम र फिजी बनाउने डिजाइनसहित अगाडि बढाउँदै छन् । यो कुरा सबैले बुझ्नुपर्छ र संयुक्त आन्दोलन अगाडि बढाउनुपर्छ ।’
राजमो दाङका अध्यक्ष गणेश आचार्यको अध्यक्षतामा भएको सो कार्यक्रममा नेकपा (मसाल) का जिल्ला प्रवक्ता भरत भण्डारी, नेकपा (एमाले) का जिल्लाध्यक्ष टीकाराम खड्का, नेकपा (माओवादी–केन्द्र) का जिल्ला सचिव तुल्सीराम पुन, जनता–समाजवादीका जिल्लाध्यक्ष होमप्रसाद शर्मा, अखिल नेपाल कानुन व्यावसायी सङ्घ (अन्ला) का उपाध्यक्ष नुमानन्द आचार्यलगायतले मन्तव्य राख्नुभएको थियोे ।
कार्यक्रमको सहजीकरण जिल्ला सदस्य सुशील पोख्रेलले गर्नुभएको थियोे ।
