काठमाडौं । जनता समाजवादी पार्टी जसपा विभाजन भपछि प्रदेश २ को राजनीतिक समीकरण बदलिएको छ । जसपाको महन्थ ठाकुर पक्षका चार मन्त्रीलाई बर्खास्त गरेका मुख्यमन्त्री लालबाबु राउतले नेपाली कांग्रेस र नेकपा (माओवादी केन्द्र)लाई सरकारमा सामेल गर्ने तयारी गर्नुभएको छ ।
मुख्यमन्त्री राउतले कांग्रेस र माओवादी केन्द्रलाई सरकारमा सहभागी गराएर मन्त्रिपरिषद विस्तार गर्ने तयारी गर्नुभएको हो । कांग्रेस र माओवादी केन्द्रले आजै सहभागी हुने तयारी गरेका छन्।
मुख्यमन्त्री लालबाबु राउतलाई आइतबार नै उपेन्द्र यादव पक्षले जसपा संसदीय दलको नेतामा चयन गरेको थियो। ठाकुर पक्ष प्रधानमन्त्री केपी शर्मा ओलीको सरकारमा सहभागी भएपछि उपेन्द्र यादव आफैँ सक्रिय भएर प्रदेश २ सरकारको सत्ता समीकरण फेरबदल गर्न सक्रिय हुनुभएको हो ।
जसपा विभाजनको असर प्रदेश २ मा, ४ मन्त्री बर्खास्त !
सुदूरपश्चिम प्रदेशका मुख्यमन्त्री भट्टले विश्वासको मत लिने
सुदूरपश्चिम प्रदेशका मुख्यमन्त्री त्रिलोचन भट्टले मङ्गलबार प्रदेशसभाबाट विश्वासको मत लिनुहुने भएको छ । आइतबार प्रदेशसभा सचिवालयमा विश्वासको मत लिने पत्र दर्ता भएअनुसार सरकारले आज विश्वासको मत लिन खोजेको तर नेपाली कांग्रेसले विरोध गरेपछि विश्वासको मत लिने कार्य मङ्लबारका लागि सरेको नेपाली कांग्रेस संसदीय दलका नेता डा. रणबहादुर रावलले जानकारी दिनुभयो ।
सुदूरपश्चिममा नेकपा (एमाले) को समर्थनमा माओवादी केन्द्रको नेतृत्वमा प्रदेश सरकार रहेकामा स्थायी कमिटी बैठकले समर्थन यही जेठ १० गते फिर्ता लिएको थियो । प्रदेश संसदीय दलको बैठकले भने समर्थन कायम राख्ने निर्णय गर्दै आफ्ना तर्फबाट मन्त्रीसमेत फेरबदल गरेको थियो ।
आजदेखि कर्णालीको बजेट अधिवेशन
कर्णाली प्रदेशसभाको बजेट अधिवेशन आजदेखि शुरु हुँदैछ । अपराह्न २ः०० बजे प्रदेशसभा भवनमा बोलाइएको अधिवेशन प्रदेश सरकारले प्रस्तुत गर्ने आगामी आर्थिक वर्षको नीति तथा कार्यक्रम, बजेटका साथै कोरोना महामारी नियन्त्रणलगायतका विषयमा केन्द्रित हुनेछ ।
प्रदेश सरकारले आगामी असार १ गते बजेट तथा त्यसको कम्तीमा एक साताअघि वार्षिक नीति तथा कार्यक्रम प्रदेशसभा बैठकमा प्रस्तुत गर्नुपर्ने संवैधानिक प्रावधान छ ।
